اسلام آباد — پاکستان کو ایک اور بین الاقوامی کھیلوں کے ایونٹ کی میزبانی کا اعزاز حاصل ہو گیا ہے، جہاں مئی 2026 میں ایشیائی ماس ریسلنگ چیمپئن شپ کا انعقاد کیا جائے گا۔ یہ فیصلہ پاکستان ماس ریسلنگ فیڈریشن کے جنرل کونسل اجلاس میں کیا گیا، جس میں 2026-2027 کے روڈ میپ کو حتمی شکل دی گئی۔
جنرل کونسل اجلاس کی صدارت پاکستان ماس ریسلنگ فیڈریشن کے صدر نواب فرقان خان نے کی، جبکہ تمام صوبائی سیکرٹریز نے اجلاس میں شرکت کرتے ہوئے اپنے صوبوں کی ایجنڈا رپورٹس، پیش رفت اور ترقیاتی تجاویز پیش کیں۔ اجلاس میں کھیل کے فروغ کے لیے مختلف پہلوؤں پر تفصیلی غور کیا گیا۔
اجلاس کے دوران جنرل کونسل نے انٹر اسکول اور انٹر کالج گیمز میں ماس ریسلنگ کو شامل کرنے اور پنک گیمز کے فروغ میں تعاون پر حکومتی حکام کا شکریہ ادا کیا۔ ان اقدامات کو نوجوانوں کی شمولیت اور کھیلوں میں مساوی مواقع کے فروغ کے لیے ایک اہم سنگ میل قرار دیا گیا۔
مزید برآں جنرل کونسل نے سندھ ماس ریسلنگ ایسوسی ایشن کو سندھ اولمپک ایسوسی ایشن کے ساتھ الحاق حاصل کرنے پر مبارکباد دی اور اسے ماس ریسلنگ کی ادارہ جاتی ترقی کے لیے ایک بڑی کامیابی قرار دیا۔
اجلاس میں باضابطہ طور پر اعلان کیا گیا کہ پاکستان 10 سے 15 مئی 2026 تک ایشیائی ماس ریسلنگ چیمپئن شپ کی میزبانی کرے گا، جس میں ایشیا بھر سے کھلاڑی اور آفیشلز شرکت کریں گے۔ یہ ایونٹ پاکستان میں ماس ریسلنگ کے فروغ اور بین الاقوامی کھیلوں کے نقشے پر ملک کے مثبت تشخص کو اجاگر کرنے میں اہم کردار ادا کرے گا۔
About The Author
