چولستان صحرائے چولستان ایک بار پھر رفتار، مہارت اور جوش و خروش کا مرکز بن گیا ہے جہاں 21ویں انٹرنیشنل چولستان ڈیزرٹ جیپ ریلی کا باقاعدہ آغاز آج سے ہو رہا ہے۔ سنسنی خیز مقابلے 15 فروری تک جاری رہیں گے، جن میں ملکی و غیر ملکی ریسرز حصہ لے رہے ہیں۔
ٹریک اور انتظامات مکمل
انتظامیہ کے مطابق ریس ٹریک کو مکمل طور پر کلیئر کر دیا گیا ہے جبکہ ایونٹ کے انعقاد کے لیے تمام تکنیکی اور انتظامی تیاریوں کو حتمی شکل دے دی گئی ہے۔ ریسرز صحرائی ریت، غیر ہموار راستوں اور طویل فاصلے پر اپنی ڈرائیونگ مہارت کا مظاہرہ کریں گے، جو اس ایونٹ کو موٹر اسپورٹس کے شائقین کے لیے خاص بناتا ہے۔
فول پروف سیکیورٹی پلان نافذ
ترجمان پولیس کے مطابق ریلی کے لیے جامع سیکیورٹی پلان جاری کر دیا گیا ہے۔ تقریباً دو ہزار پولیس اہلکار مختلف مقامات پر تعینات ہوں گے تاکہ ملکی و غیر ملکی سیاحوں اور شرکاء کی حفاظت یقینی بنائی جا سکے۔
ٹریفک کی روانی برقرار رکھنے کے لیے ڈی ایس پی ٹریفک کی نگرانی میں 400 اہلکار فرائض انجام دیں گے۔ کسی بھی ہنگامی صورتحال سے نمٹنے کے لیے موبائل فیلڈ اسپتال اور 4×4 ایمبولینسز بھی موقع پر موجود ہوں گی۔
ثقافتی رنگ اور سیاحت کا فروغ
چولستان ڈیزرٹ جیپ ریلی محض ایک اسپورٹس ایونٹ نہیں بلکہ خطے کی سیاحت اور ثقافت کے فروغ کا اہم ذریعہ بھی ہے۔ اس موقع پر ثقافتی پروگرامز کا انعقاد کیا جائے گا تاکہ سیاحوں کو چولستان کی روایتی موسیقی، دستکاری اور علاقائی ثقافت سے روشناس کرایا جا سکے۔
ماہرین کے مطابق یہ ریلی جنوبی پنجاب میں سیاحتی سرگرمیوں کو فروغ دینے، مقامی معیشت کو تقویت پہنچانے اور پاکستان کے مثبت تشخص کو عالمی سطح پر اجاگر کرنے میں اہم کردار ادا کرتی ہے۔
About The Author
