ایران کی فوج نے اعلان کیا ہے کہ اس نے ایرانی ساحل سے امریکی طیارہ بردار بحری جہاز ’’یو ایس ایس ابراہام لنکن‘‘ کو متعدد کروز میزائلوں سے نشانہ بنایا۔ ایرانی فوج کے پریس آفس کے مطابق کچھ میزائل بحری جہاز کو بھی لگے ہیں۔
ایرانی بحریہ کے کمانڈر شہرام ایرانی نے کہا کہ طیارہ بردار جہاز پر میزائل داغے گئے اور مستقبل میں مزید حملوں کے امکانات موجود ہیں۔ فوجی بیان میں بتایا گیا کہ ایرانی میزائلوں کی وجہ سے خلیج میں موجود امریکی طیارہ بردار جہاز کو اپنی پوزیشن بدلنی پڑی۔
شہرام ایرانی نے مزید کہا کہ امریکی جہاز کی نقل و حرکت پر مسلسل نگرانی جاری ہے اور جیسے ہی یہ ایرانی میزائل سسٹم کی رینج میں داخل ہوگا، یہ ایرانی بحریہ کے زوردار حملوں کا نشانہ بنے گا۔
واضح رہے کہ 13 مارچ کو ایرانی مسلح افواج کے مرکزی ہیڈ کوارٹر نے اعلان کیا تھا کہ ’’یو ایس ایس ابراہام لنکن‘‘ اور امریکی پانچویں بیڑے کے دیگر طیاروں پر میزائل اور ڈرونز سے حملہ کیا گیا تھا۔
یہ پیش رفت ایسے وقت سامنے آئی ہے جب پیر کے روز دنیا کے سب سے بڑے امریکی طیارہ بردار جہاز ’’یو ایس ایس جیرالد آر فورڈ‘‘ ایران پر حملے کے بعد یونانی جزیرے کریٹ کے بحری اڈے پر واپس پہنچا۔ فرانس پریس ایجنسی کے فوٹوگرافر کے مطابق ’’جیرالد آر فورڈ‘‘ نے ’’ابراہام لنکن‘‘ کے ساتھ مل کر اس حملے میں حصہ لیا تھا جو 28 فروری کو امریکہ اور اسرائیل کی جانب سے ایران کے خلاف شروع کیا گیا تھا۔
About The Author
