بھارتی فٹبال فیڈریشن کے صدر پر خاتون آفیشل کے ہراسانی کے الزامات -

All India Football Federation کے صدر Kalyan Chaubey پر فیڈریشن کی ویمن کمیٹی کی سربراہ Valanka Alemao نے ہراسانی کے سنگین الزامات عائد کر دیے ہیں۔

بھارتی میڈیا رپورٹس کے مطابق ولانکا الیماو نے ایک باضابطہ خط کے ذریعے صدر پر طنز، غیر ضروری روک ٹوک اور توہین آمیز رویے کا الزام لگایا ہے۔ ان کا کہنا ہے کہ یہ واقعہ دہلی میں فیڈریشن کی ایگزیکٹو کمیٹی کے اجلاس کے دوران پیش آیا۔

خط کے متن میں خاتون آفیشل نے مؤقف اختیار کیا کہ اجلاس کے دوران انہیں مسلسل نشانہ بنایا گیا، ان کی آواز دبانے کی کوشش کی گئی اور صدر سمیت دیگر اعلیٰ حکام نے ان کے ساتھ “قابلِ نفرت” رویہ اختیار کیا۔

ولانکا الیماو کے مطابق انہیں پوری میٹنگ میں دانستہ طور پر ٹارگٹ کیا گیا، اور یہ سب کچھ انہیں ہراساں کرنے اور دباؤ میں لانے کے لیے کیا گیا۔

یہ معاملہ سامنے آنے کے بعد بھارتی فٹبال حلقوں میں ہلچل مچ گئی ہے، جبکہ تاحال Kalyan Chaubey یا فیڈریشن کی جانب سے ان الزامات پر باضابطہ ردعمل سامنے نہیں آیا۔

تجزیہ کاروں کے مطابق اگر الزامات کی باقاعدہ تحقیقات شروع ہوتی ہیں تو یہ معاملہ بھارتی فٹبال انتظامیہ کے لیے ایک بڑا امتحان ثابت ہو سکتا ہے۔