نامور پاکستانی اداکارہ ریما خان نے شوبز شخصیات میرا اور ریشم کے درمیان جاری تنازع پر پہلی بار کھل کر اظہارِ خیال کرتے ہوئے انٹرویو کلچر اور میزبانوں کے رویے پر سوالات اٹھا دیے۔
ایک نجی ٹی وی پروگرام میں گفتگو کرتے ہوئے ریما خان کا کہنا تھا کہ آج کل پوڈکاسٹس اور انٹرویوز میں فنکاروں کے ساتھ نامناسب رویہ اختیار کیا جا رہا ہے، جہاں ان کے فن کے بجائے ذاتی زندگی کو موضوع بنایا جاتا ہے۔ انہوں نے خاص طور پر اس بات پر افسوس کا اظہار کیا کہ اداکارہ میرا سے بعض میزبانوں کی جانب سے توہین آمیز سوالات کیے گئے۔
ریما خان نے کہا کہ فنکار معاشرے کا اہم حصہ ہوتے ہیں اور وہ عزت کے مستحق ہیں، مگر بعض میزبان ان کے ساتھ ایسے سوالات کرتے ہیں جیسے وہ کسی سنجیدہ سیاسی یا کرنٹ افیئر پروگرام میں بیٹھے ہوں۔ ان کے مطابق اس طرح کا رویہ نہ صرف مہمان کی توہین ہے بلکہ میزبان کی اپنی ساکھ کو بھی متاثر کرتا ہے۔
اداکارہ نے ارشاد بھٹی کے پروگرام کا حوالہ دیتے ہوئے کہا کہ ایسے سوالات سے گریز کیا جانا چاہیے جو فنکار کی عزت نفس کو مجروح کریں۔
ریشم کے حوالے سے گفتگو کرتے ہوئے ریما خان نے انہیں مثبت مشورہ دیتے ہوئے کہا کہ وہ دوسروں کی باتوں پر فوری یقین کرنے کے بجائے خود حالات کا جائزہ لیا کریں۔ انہوں نے ریشم کے اندازِ گفتگو کو سراہتے ہوئے ان کے لیے نیک خواہشات کا اظہار بھی کیا۔
About The Author
