AFC U-17 Asian Cup کے سیمی فائنل میں چین انڈر 17 فٹبال ٹیم نے شاندار کارکردگی دکھاتے ہوئے آسٹریلیا انڈر 17 فٹبال ٹیم کو 0-2 گول سے شکست دے کر 22 سال بعد پہلی مرتبہ فائنل کے لیے کوالیفائی کر لیا۔
شنہوا کے مطابق میچ کے آغاز سے ہی چینی ٹیم نے جارحانہ کھیل پیش کیا اور متعدد حملے کیے، تاہم آسٹریلوی دفاعی لائن نے پہلے ہاف میں مضبوط مزاحمت کرتے ہوئے گول اسکور ہونے نہ دیا۔
چین کو میچ میں برتری 49ویں منٹ میں ملی جب شوائی ویہاؤ نے ژو یونُو کے پاس پر شاندار گراؤنڈ شاٹ کے ذریعے گیند کو جال میں پہنچا کر ٹیم کو 0-1 کی برتری دلائی۔
آسٹریلیا نے برابری کی بھرپور کوشش کی لیکن چینی ٹیم کی مضبوط دفاعی حکمتِ عملی اور جوابی حملوں نے انہیں واپس آنے کا موقع نہیں دیا۔
اضافی وقت میں متبادل کھلاڑی شے جن نے آسٹریلوی دفاعی غلطی کا فائدہ اٹھاتے ہوئے دوسرا گول اسکور کیا اور چین کی فائنل میں رسائی یقینی بنا دی۔
میچ کے بعد شوائی ویہاؤ نے کہا کہ پوری ٹیم نے اتحاد اور محنت کے ساتھ کامیابی حاصل کی۔ چینی کوچ بن اوکیشیما نے کھلاڑیوں کی کارکردگی کو سراہتے ہوئے کہا کہ ٹیم نے پورے ٹورنامنٹ میں غیر معمولی ثابت قدمی دکھائی۔
ان کا کہنا تھا کہ فائنل میں ٹیم مزید مضبوط حکمتِ عملی کے ساتھ میدان میں اترے گی۔
چین اب فائنل میں جاپان انڈر 17 فٹبال ٹیم کا سامنا کرے گا، جبکہ گروپ مرحلے میں جاپان نے چین کو 1-2 سے شکست دی تھی، جس کے بعد یہ مقابلہ مزید دلچسپ ہونے کی توقع ہے۔
About The Author
