ینگون: میانمار میں ایک بڑے دھماکے کے نتیجے میں کم از کم 55 افراد ہلاک جبکہ درجنوں زخمی ہو گئے ہیں۔ غیر ملکی میڈیا رپورٹس کے مطابق دھماکا ملک کے ایک ایسے علاقے میں ہوا جو باغی گروہوں کے زیرِ کنٹرول بتایا جا رہا ہے۔
رپورٹس کے مطابق ہلاک ہونے والوں میں 25 خواتین بھی شامل ہیں، جبکہ متعدد افراد شدید زخمی ہونے کے باعث ہلاکتوں میں اضافے کا خدشہ ظاہر کیا جا رہا ہے۔
مقامی ذرائع کے مطابق دھماکے کے بعد کئی عمارتیں منہدم ہو گئیں اور متعدد افراد ملبے تلے دب گئے۔ امدادی ٹیمیں جائے وقوعہ پر پہنچ کر ریسکیو آپریشن میں مصروف ہیں اور ملبہ ہٹانے کا عمل جاری ہے۔
حکام کا کہنا ہے کہ زخمیوں کو قریبی طبی مراکز منتقل کیا جا رہا ہے، جبکہ متاثرہ علاقے میں ہنگامی صورتحال نافذ کر دی گئی ہے۔
ابتدائی اطلاعات میں دھماکے کی نوعیت اور اسباب کے بارے میں واضح تفصیلات سامنے نہیں آئیں، تاہم متعلقہ حکام واقعے کی تحقیقات کر رہے ہیں۔
About The Author
