فہد مصطفیٰ کی پنجاب حکومت سے سینما اوقات کار میں نرمی کی اپیل، فلم انڈسٹری کو ریلیف دینے کا مطالبہ -

پاکستان شوبز انڈسٹری کے معروف اداکار اور پروڈیوسر فہد مصطفی نے پنجاب حکومت سے سینما گھروں کے اوقات کار میں نرمی کی اپیل کرتے ہوئے فلمی صنعت کے لیے خصوصی ریلیف کا مطالبہ کیا ہے۔

میڈیا رپورٹس کے مطابق فہد مصطفیٰ نے پنجاب کی سینئر وزیر مریم اورنگزیب کو ایک خط ارسال کیا ہے جس میں انہوں نے سینما انڈسٹری کو درپیش مشکلات کی نشاندہی کی۔

خط میں فہد مصطفیٰ کا کہنا ہے کہ شاپنگ مالز اور تجارتی مراکز کی جلد بندش کے باعث سینما گھروں کی سرگرمیاں متاثر ہو رہی ہیں، جس سے فلمی صنعت کو مالی نقصان کا سامنا ہے۔ انہوں نے مؤقف اختیار کیا کہ سینما اوقات کار میں معمولی توسیع سے ٹکٹوں کی فروخت میں اضافہ ہوگا اور انڈسٹری کی آمدن بہتر ہو سکے گی۔

اداکار نے حکومت سے مطالبہ کیا کہ فلم ڈسٹری بیوشن اور سینما انڈسٹری کو ریلیف فراہم کیا جائے کیونکہ یہ شعبہ ہزاروں افراد کے روزگار سے وابستہ ہے۔ ان کے مطابق سینما اوقات کار میں نرمی سے نہ صرف فلم بینوں کو سہولت ملے گی بلکہ روزگار کے نئے مواقع بھی پیدا ہوں گے۔

فہد مصطفیٰ نے اپنے خط میں پنجاب حکومت کی جانب سے فلم انڈسٹری کے فروغ کے لیے کیے جانے والے اقدامات کو سراہتے ہوئے کہا کہ حکومت کے مثبت اقدامات قابلِ تعریف ہیں، تاہم موجودہ حالات میں سینما گھروں کو مزید سہولت فراہم کرنا وقت کی ضرورت ہے۔

انہوں نے امید ظاہر کی کہ حکومت ان کی درخواست پر مثبت غور کرے گی تاکہ فلم سازوں، سینما مالکان، ڈسٹری بیوٹرز اور ناظرین سب کو اس سے فائدہ پہنچ سکے۔

واضح رہے کہ حکومت کی کفایت شعاری پالیسی کے تحت کاروباری مراکز اور سینما گھروں کے اوقات کار محدود کیے گئے تھے، جس کے بعد فلمی صنعت سے وابستہ حلقوں کی جانب سے ان پابندیوں میں نرمی کا مطالبہ مسلسل سامنے آ رہا ہے۔