امریکا کی جانب سے ایران میں کیے گئے حالیہ فضائی حملوں کے بعد ایران کی اسلامی انقلابی گارڈ کور (پاسداران انقلاب) نے دعویٰ کیا ہے کہ اس نے خطے میں موجود متعدد امریکی فوجی تنصیبات کو نشانہ بنایا ہے۔
پاسداران انقلاب کے مطابق بحرین میں تعینات امریکی ففتھ فلیٹ پر ڈرون حملہ کیا گیا، جبکہ الازرق ایئر بیس میں واقع امریکی فوجی اڈے پر میزائل داغے گئے۔ ایرانی بیان میں دعویٰ کیا گیا کہ ان کارروائیوں کے دوران چار مختلف اہداف کو نشانہ بنایا گیا جن میں ایف-35 طیاروں کے ہینگرز اور کمانڈ اینڈ کنٹرول مراکز شامل تھے۔
ایرانی فوجی ترجمان کے مطابق علی السالم ایئر بیس پر بھی ڈرون حملے کیے گئے۔ ان کا کہنا تھا کہ اگر امریکا کی جانب سے ایران کے خلاف کارروائیاں جاری رہیں تو تہران مزید سخت اور فیصلہ کن ردعمل دے گا۔
پاسداران انقلاب نے دعویٰ کیا کہ یہ جوابی کارروائی جنوبی ایران میں امریکی حملوں کے ردعمل میں کی گئی ہے۔ ایرانی حکام کے مطابق امریکی حملوں کے نتیجے میں سیریک کے علاقے میں ایک ٹیلی کمیونیکیشن ٹاور اور دو واٹر ٹینکوں کو نقصان پہنچا، جبکہ بوشہر صوبے میں ایک امریکی ڈرون کو بھی تباہ کر دیا گیا۔
دوسری جانب بحرین میں خطرے کے سائرن بجنے کی اطلاعات موصول ہوئی ہیں، جہاں حکام نے اعلان کیا کہ ممکنہ فضائی خطرات کا کامیابی سے مقابلہ کیا گیا۔ اسی طرح کویتی فوج نے بھی اپنے بیان میں کہا کہ اس کی فضائی دفاعی فورسز نے مشتبہ فضائی اہداف کو تباہ کر دیا ہے۔
تاحال امریکی حکام کی جانب سے ایرانی دعوؤں کی مکمل تصدیق نہیں کی گئی۔ آزاد ذرائع سے بھی ان حملوں کے تمام تفصیلات اور نقصانات کی تصدیق سامنے نہیں آئی ہے۔
About The Author
