جنوبی لبنان میں کشیدگی میں مزید اضافہ ہو گیا ہے، جہاں حزب اللہ کے حملوں میں اسرائیلی فوج (آئی ڈی ایف) کے ایک ٹینک بٹالین کمانڈر سمیت چار فوجی ہلاک جبکہ پانچ دیگر زخمی ہو گئے ہیں۔ اسرائیلی فوج نے ہلاکتوں اور زخمیوں کی تصدیق کرتے ہوئے واقعے کی تحقیقات شروع کر دی ہیں۔
آئی ڈی ایف کے مطابق ہلاک ہونے والوں میں 32 سالہ لیفٹیننٹ کرنل ڈور گیڈالیا بین سمہون بھی شامل ہیں، جو بیت ہاشیتا کے رہائشی اور 401ویں آرمرڈ بریگیڈ کی 52ویں بٹالین کے کمانڈر تھے۔ وہ اپریل میں شدید زخمی ہونے والے سابق بٹالین کمانڈر کی جگہ تعینات کیے گئے تھے۔
فوجی بیان کے مطابق آدھی رات کے بعد جنوبی لبنان کے گاؤں کفار تبنیت میں ایک ٹینک کو نشانہ بنایا گیا۔ ابتدائی اطلاعات کے مطابق حملہ یا تو ٹینک شکن میزائل سے کیا گیا یا پھر ایک دھماکہ خیز ڈرون ٹینک سے ٹکرایا۔ دھماکے کے نتیجے میں ٹینک میں موجود چاروں اہلکار ہلاک ہو گئے۔ اسرائیلی فوج نے واضح کیا ہے کہ دھماکے کی نوعیت کے بارے میں تحقیقات جاری ہیں۔
چند گھنٹے بعد اسی علاقے میں حزب اللہ کی جانب سے ایک اور دھماکہ خیز ڈرون حملہ کیا گیا، جس میں کمانڈو بریگیڈ کے اہلکار نشانہ بنے۔ اس حملے میں ایک ریزرو افسر شدید زخمی ہوا جبکہ تین ریزرو فوجیوں اور ایک نان کمیشنڈ افسر کو معمولی نوعیت کے زخم آئے۔
اسرائیلی فوج کے مطابق تمام زخمیوں کو فوری طور پر اسپتال منتقل کر دیا گیا اور ان کے اہل خانہ کو بھی آگاہ کر دیا گیا ہے۔
About The Author
