فیفا ورلڈ کپ 2026 میں گروپ جی اور گروپ ایچ کے مقابلوں میں دلچسپ اور سنسنی خیز نتائج سامنے آئے، جہاں مصر نے نیوزی لینڈ کو شکست دے کر اپنے گروپ میں پہلی پوزیشن حاصل کرلی، جبکہ ایران اور بیلجیئم کا مقابلہ بغیر کسی گول کے برابر رہا۔
گروپ جی کے اہم میچ میں نیوزی لینڈ نے پہلے ہاف کے 15ویں منٹ میں گول کرکے برتری حاصل کی، تاہم دوسرے ہاف میں مصر نے زبردست واپسی کرتے ہوئے مسلسل تین گول اسکور کیے۔
58ویں منٹ میں مصطفیٰ زیکو نے میچ برابر کیا، جبکہ اسٹار فارورڈ Mohamed Salah نے 67ویں منٹ میں مصر کو برتری دلائی۔ اس کے بعد ٹریزیگوئے نے تیسرا گول کرکے مصر کی فتح یقینی بنا دی۔
3-1 کی کامیابی کے بعد مصر چار پوائنٹس کے ساتھ گروپ جی میں سرفہرست آ گیا۔
دوسری جانب لاس اینجلس اسٹیڈیم میں ایران اور بیلجیئم کے درمیان سخت مقابلہ ہوا لیکن دونوں ٹیمیں کوئی گول کرنے میں کامیاب نہ ہو سکیں۔
پہلے ہاف میں ایران کا ایک گول آف سائیڈ قرار دے کر مسترد کر دیا گیا، جبکہ ایرانی گول کیپر علی رضا نے شاندار کارکردگی کا مظاہرہ کرتے ہوئے متعدد یقینی گول بچائے۔ ماہرین نے ان کی ایک سیو کو "سیو آف دی ٹورنامنٹ” قرار دیا۔
بیلجیئم کے تجربہ کار گول کیپر کورٹوا نے بھی عمدہ گول کیپنگ کی، جبکہ دوسرے ہاف میں بیلجیئم کے ایک کھلاڑی کو خطرناک فاؤل پر ریڈ کارڈ دکھایا گیا، جس کے بعد ٹیم بقیہ میچ دس کھلاڑیوں کے ساتھ کھیلتی رہی۔
میچ بغیر کسی گول کے برابر ختم ہوا اور دونوں ٹیموں کے مجموعی طور پر دو، دو پوائنٹس ہوگئے۔
گروپ ایچ میں اسپین نے سعودی عرب کو یکطرفہ مقابلے کے بعد 4-0 سے شکست دی۔ اسپین کے میکل اویارزابال نے دو گول کیے جبکہ باقی دو گول بھی ہسپانوی ٹیم نے اپنی برتری مستحکم کرنے کے لیے اسکور کیے۔
ادھر گروپ ایچ کے ایک اور سنسنی خیز مقابلے میں نووارد کیپ ورڈی نے تجربہ کار یوراگوئے کے خلاف 2-2 سے ڈرا کھیل کر ٹورنامنٹ میں اپنا دوسرا پوائنٹ حاصل کر لیا۔
کیپ ورڈی کی جانب سے کیون پینا نے 21ویں منٹ میں گول کیا، جبکہ یوراگوئے نے پہلے ہاف کے اختتام سے قبل دو گول کرکے برتری حاصل کر لی۔ دوسرے ہاف میں ہیلیو وریلا نے 61ویں منٹ میں گول کرکے مقابلہ برابر کر دیا اور دونوں ٹیمیں ایک، ایک پوائنٹ لینے میں کامیاب رہیں۔
About The Author
