ایران کا ہمسایہ ممالک سے تصادم کا ارادہ نہیں، امریکی حملے جاری رہے تو جنگ نئے محاذوں تک پھیل سکتی ہے -

ایرانی فوج کے ترجمان محمد اکرمینیا نے کہا ہے کہ ایران کا اپنے ہمسایہ ممالک یا خطے کے اسلامی ممالک کے ساتھ کسی قسم کے تصادم کا ارادہ نہیں، تاہم اگر امریکا کی جانب سے ایران پر فوجی حملے جاری رہے تو جنگ کا دائرہ نئے محاذوں تک پھیل سکتا ہے۔

اپنے بیان میں محمد اکرمینیا نے کہا کہ ایران ہمیشہ خطے کے ممالک کے ساتھ برادرانہ تعلقات، باہمی احترام اور تعاون کے فروغ کا حامی رہا ہے۔ ان کے مطابق ایران کی مسلح افواج کی اولین ذمہ داری ملک کی سلامتی، قومی مفادات اور خودمختاری کا دفاع کرنا ہے، اور اس مقصد کے لیے ہر ممکن اقدام کیا جائے گا۔

ترجمان نے واضح کیا کہ ایران اپنے پڑوسی ممالک کے خلاف کسی بھی قسم کی محاذ آرائی نہیں چاہتا بلکہ خطے میں امن، استحکام اور تعاون کو فروغ دینا اس کی ترجیح ہے۔

انہوں نے امریکا کو خبردار کرتے ہوئے کہا کہ اگر ایرانی سرزمین پر فوجی کارروائیاں جاری رہیں تو ایران اپنی جوابی کارروائیوں کا دائرہ مزید وسیع کر سکتا ہے۔ ان کا کہنا تھا کہ امریکی جارحیت برقرار رہی تو جنگ نئے محاذوں تک پھیل سکتی ہے۔