امریکہ اور ایران کے درمیان ‘اچھی بات چیت’ جاری، خطے میں ڈرون حملوں سے کشیدگی برقرار -

امریکی صدر ڈونلڈ ٹرمپ نے کہا ہے کہ امریکہ اور ایران کے درمیان "اچھی بات چیت” جاری ہے اور دونوں ممالک کے درمیان تنازع کے حل کے لیے کسی معاہدے تک پہنچنے کا امکان موجود ہے، تاہم انہوں نے خبردار کیا کہ اگر سفارتی کوششیں ناکام ہوئیں تو امریکہ دوبارہ فوجی کارروائیاں شروع کر سکتا ہے۔

واشنگٹن میں صحافیوں سے گفتگو کرتے ہوئے صدر ٹرمپ نے کہا، "ہماری ایران کے ساتھ اچھی بات چیت ہو رہی ہے۔ میرا خیال ہے کہ کچھ مثبت پیش رفت کا اچھا امکان ہے، لیکن اگر ایسا نہ ہوا تو ہم وہی کریں گے جو دو دن پہلے کر رہے تھے۔”

بعد ازاں ریاست مشی گن میں ایک انتخابی ریلی سے خطاب کرتے ہوئے ٹرمپ نے کہا کہ ایران کو "رشوت دے کر نہیں بلکہ طاقت سے روکا جا سکتا ہے”، تاہم انہوں نے اس بات کا بھی اعادہ کیا کہ اس وقت دونوں فریقوں کے درمیان "بہت دوستانہ مذاکرات” جاری ہیں۔

ٹرمپ کا یہ بیان ایسے وقت میں سامنے آیا ہے جب امریکہ نے ایران کے خلاف فضائی حملوں کی دو ہفتے تک جاری رہنے والی مہم کو عارضی طور پر معطل کر رکھا ہے، جسے مبصرین واشنگٹن کی حکمت عملی میں ایک اہم تبدیلی قرار دے رہے ہیں۔