جنوبی کوریا کا دعویٰ، شمالی کوریا کے پاس 80 سے 120 جوہری وار ہیڈز ہیں -

جنوبی کوریا نے اندازہ ظاہر کیا ہے کہ شمالی کوریا کے پاس 80 سے 120 جوہری وار ہیڈز موجود ہوسکتے ہیں۔ جنوبی کوریا کے وزیر دفاع آن گیو بیک نے پارلیمانی سماعت کے دوران یہ تخمینہ پیش کیا۔

جنوبی کوریا کے وزیر دفاع نے کہا کہ شمالی کوریا کے جوہری ہتھیاروں کی درست تعداد معلوم کرنا انتہائی مشکل ہے۔ انہوں نے واضح کیا کہ جنوبی کوریا شمالی کوریا کے پاس موجود وار ہیڈز کی حتمی تعداد کی تصدیق نہیں کرسکتا۔ ان کے مطابق 80 سے 120 کا تخمینہ نجی تحقیقی اداروں کے اعداد و شمار کی بنیاد پر ہے۔

جنوبی کوریا کے وزیر دفاع نے کہا کہ ان کا ملک اپنے جوہری ہتھیار تیار نہیں کرسکتا۔ انہوں نے امریکی ٹیکٹیکل جوہری ہتھیار جنوبی کوریا میں تعینات کرنے کی مخالفت بھی کی۔ سیئول نے اس کے بجائے امریکی جوہری چھتری پر انحصار جاری رکھنے کا مؤقف اختیار کیا ہے۔

جنوبی کوریا کا تازہ تخمینہ امریکی صدر ڈونلڈ ٹرمپ کے بیان سے مختلف ہے۔ ٹرمپ نے ایک روز قبل دعویٰ کیا تھا کہ شمالی کوریا کے پاس 57 جوہری ہتھیار ہیں۔