یمن کے قریب خلیج عدن میں ایک ٹینکر پر مسلح افراد نے قبضہ کرلیا۔ برطانوی میری ٹائم ٹریڈ آپریشنز کے مطابق 6 مسلح افراد ٹینکر پر سوار ہوئے۔ مسلح افراد نے جہاز کا کنٹرول سنبھالنے کے بعد اس کا رخ صومالیہ کی جانب موڑ دیا۔
برطانوی میری ٹائم ٹریڈ آپریشنز کے مطابق واقعہ یمن کی المکلا بندرگاہ سے تقریباً 136 ناٹیکل میل مشرق میں پیش آیا۔ ادارے کو خلیج عدن میں سفر کرنے والے ایک ٹینکر سے اطلاع موصول ہوئی تھی۔ ٹینکر مغرب کی جانب سفر کر رہا تھا۔ اسی دوران ایک غیر مجاز کشتی ٹینکر کے قریب پہنچی۔ میری ٹائم ٹریڈ آپریشنز نے واقعے کی مزید تفصیلات جاری نہیں کیں۔ ادارے نے یہ بھی نہیں بتایا کہ ٹینکر پر موجود عملہ محفوظ ہے یا نہیں۔ مسلح افراد کی شناخت اور ان کے ممکنہ مقصد کے بارے میں بھی فوری طور پر معلومات سامنے نہیں آئیں۔ رائٹرز کے مطابق واقعے کی مزید تفصیلات حاصل کرنے کی کوشش کی جا رہی ہے۔
خلیج عدن عالمی بحری تجارت کے لیے ایک اہم سمندری راستہ ہے۔ یمن کے قریب اس خطے میں حالیہ برسوں کے دوران بحری جہازوں کو سکیورٹی خطرات کا سامنا رہا ہے۔ تازہ واقعے نے تجارتی جہازوں کی حفاظت سے متعلق خدشات ایک بار پھر بڑھا دیے ہیں۔ متعلقہ ادارے واقعے کی صورتحال پر نظر رکھے ہوئے ہیں۔
About The Author
