امریکا میں سابق میجر نڈال حسن کی سزائے موت براہ راست نشر کرنے کا اعلان -

امریکی وزیر دفاع پیٹ ہیگستھ نے اعلان کیا ہے کہ 2009 میں فورٹ ہُڈ فوجی اڈے پر فائرنگ کرنے والے سابق فوجی افسر نڈال ملک حسن کی سزائے موت براہ راست نشر کی جائے گی۔

امریکی محکمہ دفاع کے مطابق نڈال حسن کو 3 دسمبر 2026 کو ٹیکساس کے فورٹ ہُڈ فوجی اڈے پر فائرنگ اسکواڈ کے ذریعے سزائے موت دی جائے گی۔ امریکی حکام نے اس کارروائی کو براہ راست نشر کرنے کی بھی تصدیق کی ہے۔

امریکی وزیر دفاع پیٹ ہیگستھ نے قدامت پسند ٹی وی چینل ریئل امریکا وائس کو انٹرویو دیا۔ انہوں نے کہا کہ حکومت اس بات کو یقینی بنائے گی کہ لوگ سزائے موت کی کارروائی دیکھ سکیں۔

ہیگستھ کے مطابق عوام کو ایسے جرائم کے سنگین نتائج سمجھنے چاہییں۔ انہوں نے فائرنگ اسکواڈ کے ذریعے سزا دینے کی حمایت بھی کی۔

پینٹاگون کے ترجمان شان پارنیل کے مطابق وزیر دفاع نے فائرنگ اسکواڈ کے ذریعے سزائے موت دینے کی سفارش کی تھی۔ صدر ڈونلڈ ٹرمپ نے 2 اکتوبر کو اس کی منظوری دی۔

امریکی فوج کے مطابق نڈال حسن کی سزا پر عمل درآمد 3 دسمبر کو مقامی وقت کے مطابق دوپہر ایک بجے ہوگا۔ یہ کارروائی فورٹ ہُڈ میں ہوگی، جہاں 2009 میں فائرنگ کا واقعہ پیش آیا تھا۔