عالمی منڈیوں میں ستمبرکے دوران توانائی کی قیمتوں میں کمی

اسلام آباد:عالمی منڈیوں میں ستمبرکے دوران توانائی کی قیمتوں میں کمی آئی ہے تاہم اس کے برعکس زرعی مصنوعات اوردھاتوں کی قیمت میں عمومی اضافہ ریکارڈکیاگیاہے۔یہ بات عالمی بینک کی جانب سے پنک شیٹ کے عنوان سے قیمتوں بارے جاری ماہانہ رپورٹ میں کہی گئی ہے۔رپورٹ کے مطابق ستمبر2024میں توانائی کی قیمتوں میں مجموعی طورپر7.1فیصدکی کمی ہوئی، یورپین قدرتی گیس کی قیمت میں ستمبرکے دوران 4.8فیصد اورخام تیل کی قیمت میں7.1فیصدکی کمی ہوئی،نان انرجی اشیاء کی قیمت میں مجموعی طورپر2.3فیصدکااضافہ ہوا۔

رپورٹ کے مطابق ستمبر2024میں زرعی مصنوعات کی قیمت میں 2.8فیصدکااضافہ ہوا، اشیاء خوراک کی قیمتوں میں اضافہ کی شرح 3.1فیصدریکارڈکی گئی ہے،ستمبرمیں مکئی کی قیمت میں 8.6فیصد اورگندم کی قیمت میں 7.5فیصدکااضافہ ہوا،مشروبات کی قیمت میں 1.4فیصد اضافہ جبکہ کھادوں کی قیمت میں 1.1فیصدکی کمی ہوئی۔رپورٹ کے مطابق دھاتوں کی قیمت میں اضافہ کی شرح 1.8فیصدریکارڈکی گئی،تانبا کی قیمت میں 3فیصد، ایلومینیم کی قیمت میں 4.5فیصد جبکہ چاندی کی قیمت میں 5.6فیصدکی نموریکارڈکی گئی ہے۔