اسلام آباد(وژن پوائنٹ نیوز) پاکستان نے ترکی کے دفاعی ادارے پر ہونے والے حملے کی مذمت کی ہے جس میں چار افرادشہید14 زخمی ہوئے ہیں۔سیکیورٹی اداروں نے دو حملہ آوروں کو ہلاک کردیا ہے حملہ آوروں میں ایک خاتون بھی شامل تھی ابھی تک کسی تنظیم نے واقعہ کی ذمہ داری قبول نہیں کی۔
دفتر خارجہ کی جانب سے جاری کیے جانے والے بیان میں کہا گیا ہے کہ ’ہم متاثرین کے خاندان والوں سے اظہار تعزیت کرتے ہیں جبکہ زخمی ہونے والوں کی تیزی سے صحتیابی کی کے لیے دعا گو ہیں۔‘
بیان میں کہا گیا ہے کہ ’ہمیں یقین ہے کہ بہادر ترک قوم اپنی خصوصی ہمت اور عزم کے ساتھ دہشت گردی کے عفریت کو شکست دے گی۔‘
ترکی کے نجی ٹیلی ویژن این ٹی وی نے بتایا کہ سکیورٹی اہلکاروں کی تبدیلی کے دوران حملہ آور ٹیکسی کے ذریعے کمپلیکس کے داخلی دروازے پر پہنچے۔ حملہ آوروں میں سے کم از کم ایک نے بم دھماکہ کیا جبکہ دیگر حملہ آور کمپلیکس میں فائرنگ کرتے ہوئے داخل ہونے میں کامیاب ہو گئے۔
این ٹی وی کے مطابق جائے وقوعہ پر فائرنگ کا سلسلہ جاری ہے اور ہو سکتا ہے کہ کمپلیکس کے کچھ اہلکاروں کو یرغمال بنا لیا گیا ہو۔ہیلی کاپٹر احاطے کے اوپر اڑتے ہوئے دیکھے گئے۔
این ٹی وی نے رپورٹ کیا کہ سکیورٹی فورسز، ایمبولینس اور فائر فائٹرز کو جائے وقوعہ پر روانہ کر دیا گیا ہے۔ کمپنی کے ملازمین کو ایک محفوظ علاقے میں لے جایا گیا۔
