راولپنڈی : سابق آرمی چیف جنرل باجوہ نے بشریٰ بی بی کی جانب سے سعودی عرب پر لگائے گئے الزامات کی سختی سے تردید کردی۔
انگریزی اخبار دی نیوز میں سینئر صحافی انصار عباسی کی رپورٹ کے مطابق جنرل باجوہ کے قریبی ذریعے نے بتایا ہے کہ جو کچھ بھی بشریٰ بی بی نے اپنے ویڈیو پیغام میں سعودی حکمرانوں کی عمران خان اور بشریٰ بی بی کیخلاف ناراضی کے متعلق اُن (جنرل باجوہ) کے حوالے سے کہا ہے؛ وہ سن کر جنرل باجوہ کو حیرانی ہوئی ہے۔
ذرائع نے باجوہ کے حوالے سے کہا ہے کہ یہ سب جھوٹ باتیں ہیں اور میں یہ بات حلفیہ کہہ سکتا ہوں۔ ذریعے نے مزید کہا کہ جنرل باجوہ نے یاد دلایا کہ سعودی عرب کے اُن کے پریشان کن دورے کے بعد جب بشریٰ بی بی اور عمران سعودی عرب کا دورہ کر رہے تھے تو انہیں انہی سعودی حکمرانوں نے واچ اور نیکلس جیسے مہنگے تحفے دیے تھے۔
ذریعے نے بتایا کہ جنرل باجوہ نے یاد دلایا کہ بشریٰ بی بی بھی بعد میں اپنی بیٹی کے نکاح کیلئے سعودی عرب گئی تھیں۔
