چیئرمین پی ٹی آئی بیرسٹرگوہر کا کہنا ہے کہ 28 ویں ترمیم پرپارلیمانی پارٹی اجلاس میں بات نہیں ہوئی، عمران خان کی رہائی کے بدلے اٹھائیس ویں ترمیم کو ووٹ دینے سمیت کوئی ڈیل نہیں کریں گے۔
اسلام آباد میں میڈیا سے گفتگو میں بیرسٹرگوہر کا کہنا تھا کہ 28 ویں ترمیم پر پارلیمانی پارٹی اجلاس میں بات ہوئی نہ ہی یہ ایجنڈے کا حصہ تھی، عمران خان نے کہا ہے کہ میں 100 سال جیل میں گزار سکتا ہوں لیکن سمجھوتہ نہیں کروں گا۔
چیئرمین پی ٹی آئی کا کہنا تھا کہ پارلیمانی پارٹی نے پوری قیادت پر اعتماد کا اظہار کیا، پارلیمانی پارٹی کی سفارشات دونوں لیڈر آف اپوزیشن کو بھیجیں گے، نئے صوبوں کے حامی تاہم عوام کی مرضی کے بغیر نہیں ہونا چاہئے۔
بیرسٹر گوہر کے برعکس بیرسٹر علی ظفر نے نمائندہ خصوصی سماء سے گفتگو میں کہا کہ پارلیمانی پارٹی اجلاس میں اٹھائیسویں ترمیم کا معاملہ زیر بحث آیا تھا۔ کچھ ارکان نے رائے دی کہ عمران خان کی رہائی کے بدلے اس پر غور کرنا چاہیے، ابھی آئینی ترمیم پر کوئی فیصلہ نہیں ہوا۔ اٹھائیسویں ترمیم کے تناظر میں کچھ ریلیف مل سکتا ہے تو ضرور کرنا چاہیے۔
