ہانگ کانگ انٹرنیشنل سپر سکسز کے گروپ سی میچ میں متحدہ عرب امارات نے پاکستان کو شکست دے دی۔ یو اے ای نے سنسنی خیز مقابلے کے بعد ایک وکٹ سے کامیابی حاصل کی۔
دفاعی چیمپئن پاکستان نے پہلے بیٹنگ کرتے ہوئے 106 رنز بنائے۔ جواب میں یو اے ای نے آخری گیند پر ہدف حاصل کرلیا۔ اس نے پانچ وکٹوں کے نقصان پر 107 رنز بنائے۔
گرین شرٹس ایونٹ میں اپنے اعزاز کا دفاع کررہے ہیں۔ پاکستان نے 2025 کا فائنل جیت کر ٹائٹل اپنے نام کیا تھا۔ فیصلہ کن مقابلے میں کویت کو شکست ہوئی تھی۔
مونگ کوک میں کھیلے گئے میچ میں پاکستان نے ٹاس جیت کر پہلے بیٹنگ کا فیصلہ کیا۔ قومی ٹیم نے مقررہ چھ اوورز میں تین وکٹوں کے نقصان پر 106 رنز بنائے۔
پاکستان کی جانب سے خواجہ نافع اور عبدالصمد نے اننگز کا آغاز کیا۔ تاہم، خواجہ نافع صرف چار گیندوں پر تین رنز بنا سکے۔ وہ محمد فاروق کی گیند پر زاہد علی کے ہاتھوں کیچ آؤٹ ہوئے۔
اس کے بعد عبدالصمد اور کپتان عباس آفریدی نے جارحانہ بیٹنگ کی۔ دونوں نے تیزی سے رنز بنا کر ٹیم کو مضبوط پوزیشن میں پہنچایا۔
عباس آفریدی نے صرف 13 گیندوں پر 53 رنز کی دھواں دار اننگز کھیلی۔ ان کی اننگز میں ایک چوکا اور آٹھ چھکے شامل تھے۔ وہ ریٹائرڈ آؤٹ ہوئے۔
دوسری جانب، عبدالصمد نے 15 گیندوں پر ناقابل شکست 39 رنز بنائے۔ ان کی اننگز میں پانچ چوکے اور دو چھکے شامل تھے۔
عرفان خان تین گیندوں پر آٹھ رنز بنا کر محمد فاروق کی گیند پر آؤٹ ہوئے۔ سعد مسعود ایک رن کے ساتھ ناٹ آؤٹ رہے۔
107 رنز کے ہدف کے تعاقب میں یو اے ای کو ابتدا میں نقصان اٹھانا پڑا۔ انش ٹنڈن پہلے ہی اوور میں ایک رن بنا کر بولڈ ہوگئے۔ انہیں عباس آفریدی نے آؤٹ کیا۔
محمد ذوہیب چار گیندوں پر سات رنز بنا سکے۔ وہ عبدالصمد کی گیند پر کیچ آؤٹ ہوئے۔ معروف مرچنٹ تین گیندوں پر دو رنز بنا کر ریٹائرڈ آؤٹ ہوگئے۔ محمد فاروق بھی ریٹائرڈ آؤٹ ہوئے۔
تاہم، یو اے ای کے کپتان خالد شاہ نے جارحانہ بیٹنگ سے مقابلے کی صورتحال بدل دی۔ انہوں نے پاکستانی بولرز کے خلاف بھرپور مزاحمت کی۔
خالد شاہ نے صرف 20 گیندوں پر 71 رنز کی شاندار اننگز کھیلی۔ ان کی اننگز میں تین چوکے اور نو چھکے شامل تھے۔ وہ عرفان خان کی گیند پر خواجہ نافع کے ہاتھوں کیچ آؤٹ ہوئے۔
خالد شاہ کے آؤٹ ہونے کے بعد زاہد علی نے ذمہ دارانہ بیٹنگ کی۔ انہوں نے آٹھ گیندوں پر ناقابل شکست 22 رنز بنائے۔
زاہد علی نے آخری گیند پر چھکا لگا کر یو اے ای کو فتح دلائی۔ ان کی اننگز میں دو چوکے اور دو چھکے شامل تھے۔
پاکستان کی جانب سے عباس آفریدی، عبدالصمد اور عرفان خان نے ایک، ایک وکٹ حاصل کی۔ خالد شاہ کو شاندار اننگز پر پلیئر آف دی میچ قرار دیا گیا۔
