بہاولپور: معرکہ بنیان مرصوص میں بہادری کا مظاہرہ کرنے والے افواج پاکستان کے جوانوں کو بہاولپور کے شہریوں نے زبردست خراج تحسین پیش کیا۔ شہر کی بڑی تعداد سڑکوں پر نکل آئی اور اپنے فوجی جوانوں کا والہانہ استقبال کیا۔
بھارتی جارحیت کا منہ توڑ جواب دینے پر عوام کا جوش و خروش دیدنی تھا۔ غیور شہریوں نے فوجی جوانوں پر گل پاشی کی اور فضا ’’پاک فوج زندہ باد‘‘ کے نعروں سے گونجتی رہی۔ شہریوں، بزرگوں، نوجوانوں اور معصوم بچوں نے فوجی جوانوں کو پھولوں کے ہار پہنائے اور ان کی بے مثال بہادری کو سلام پیش کیا۔
https://visionpointpk.com/wp-content/uploads/2025/05/WhatsApp-Video-2025-05-15-at-11.07.16.mp4
اس موقع پر قومی یکجہتی کا ایک دلکش منظر دیکھنے میں آیا، جہاں ہر فرد نے اپنے فوجی جوانوں سے اپنی گہری محبت اور حمایت کا بھرپور اظہار کیا۔ بہاولپور کے پرجوش شہریوں کا کہنا تھا کہ پاک فوج نے وطن عزیز کا دفاع کر کے پوری قوم کا سر فخر سے بلند کر دیا ہے۔ انہوں نے اس عزم کا اظہار کیا کہ وہ اپنی بہادر افواج کے ساتھ ہمیشہ شانہ بشانہ کھڑے رہیں گے۔
