اسلام آباد : وزارت خزانہ کے مطابق فی الحال ملک میں پیٹرولیم مصنوعات کے وافر ذخائر موجود ہیں، اس حوالے سے کسی فوری بحران کا خطرہ نہیں۔
وزیرخزانہ محمد اورنگزیب کی زیرصدارت اعلیٰ سطح کمیٹی اجلاس میں علاقائی کشیدگی کے تناظر میں پیٹرولیم مصنوعات کی قیمتوں کا جائزہ لیا گیا۔
شرکاء کو بتایا گیا کہ فی الحال ملک میں پیٹرولیم مصنوعات کے وافر ذخائر موجود ہیں، جس پر کمیٹی نے اطمینان کا اظہار کیا۔
ایران پر اسرائیلی حملے کے بعد خطے میں کشیدگی، عالمی منڈی میں تیل قیمتوں میں اتار چڑھاؤ پر غور کیا گیا۔ بدلتے حالات کے پیش نظر صورتحال کی مسلسل نگرانی پر زور دیا گیا۔
اجلاس میں فیصلہ کیا گیا ایک ورکنگ گروپ روزانہ کی بنیاد پرصورتحال کا جائزہ لے گا، کمیٹی ہر ہفتے اجلاس کر کے وزیراعظم کو سفارشات پیش کرے گی۔ پیٹرولیم ڈویژن کو سیکرٹریٹ کے فرائض سونپے گئے ہیں۔
قبل ازیں وفاقی حکومت نے پیٹرولیم مصنوعات کی نئی قیمتوں کا اعلان کر دیا ہے، وزارت خزانہ کی جانب سے جاری کردہ نوٹیفکیشن کے مطابق پیٹرول کی قیمت میں 4 روپے 80 پیسے جبکہ ہائی اسپیڈ ڈیزل کی قیمت میں 7 روپے 95 پیسے کا اضافہ کیا گیا ہے۔
حالیہ اضافے کے بعد پیٹرول کی نئی قیمت 258 روپے 43 پیسے جبکہ ہائی اسپیڈ ڈیزل کی نئی قیمت 262 روپے 59 پیسے مقرر کی گئی ہے
