لاہور — وزیراعلیٰ پنجاب مریم نواز کی خصوصی ہدایات پر وائلڈ لائف رینجرز کی جانب سے سیلاب سے متاثرہ اضلاع میں جنگلی حیات کے تحفظ کے لیے ہنگامی آپریشن جاری ہے، جس کے دوران اب تک مجموعی طور پر 8 ہرنوں کو ریسکیو کیا جا چکا ہے۔
محکمہ وائلڈ لائف کے مطابق ریسکیو کیے گئے ہرنوں کو خصوصی ویٹرنری کیمپوں میں منتقل کر دیا گیا ہے، جہاں ان کا معائنہ اور علاج جاری ہے۔
مختلف اضلاع سے ریسکیو آپریشن
- سیالکوٹ میں 26 اگست کو سرحد پار سے آنے والے سیلابی پانی میں بہہ کر پہنچنے والے ہرنوں کے ایک جوڑے کو زندہ بچایا گیا۔
- نارووال سے 27 اگست کو ایک زخمی اور حاملہ ہرن کو محفوظ مقام پر منتقل کیا گیا اور فوری طبی امداد فراہم کی گئی۔
- اسی روز شکر گڑھ میں ایک نابالغ ہرن کو بھی کامیابی سے ریسکیو کیا گیا۔
- مریدکے، وزیرآباد اور منڈی بہاؤالدین میں 28 اگست کو کیے گئے ریسکیو آپریشنز کے دوران مزید 3 نر اور 2 مادہ ہرنوں کو بچایا گیا۔
محکمہ وائلڈ لائف کے حکام کے مطابق ریسکیو آپریشن میں جدید تھرمل ٹیکنالوجی کا استعمال کیا جا رہا ہے، جس کے ذریعے پانی اور جھاڑیوں میں چھپے جانوروں کو شناخت کر کے محفوظ مقام پر منتقل کیا جا رہا ہے۔
حکام نے بتایا کہ سیلابی علاقوں میں جنگلی حیات کے تحفظ کے لیے ریسکیو مشن آئندہ چند روز تک جاری رہے گا۔
About The Author
