لاہور — پاکستان ٹیلی ویژن کے سینئر اداکار اور معروف ڈرامہ آرٹسٹ عزیر عباسی طویل علالت کے بعد انتقال کر گئے۔ اُن کے انتقال کی خبر سے شوبز انڈسٹری اور مداحوں میں گہرے دکھ اور صدمے کی لہر دوڑ گئی۔
عزیر عباسی طویل عرصے تک پاکستانی ڈرامہ انڈسٹری سے وابستہ رہے اور متعدد یادگار کردار ادا کیے جنہوں نے انہیں ایک باوقار اور ہمہ جہت اداکار کے طور پر متعارف کرایا۔
انہیں سب سے زیادہ شہرت ڈرامہ سیریل “انتقام” میں رشید بابا کے کردار سے ملی، جس میں اُن کی شاندار اداکاری اور خوبصورت اردو تلفظ نے ناظرین کے دل جیت لیے۔
عزیر عباسی نے کئی مشہور ڈراموں میں بھی کام کیا جن میں کراچی ڈویژن (2021)، باشو (2023)، ہیر رانجھا (2012) اور کھلونا شامل ہیں۔ ان کے کرداروں نے انہیں ایک سنجیدہ، نپی تلی اور باوقار اداکاری کے لیے منفرد شناخت دی۔
ان کا تعلق ایک فنکار گھرانے سے تھا۔ اُن کے بڑے بھائی زبیر عباسی معروف پروڈیوسر و ڈائریکٹر تھے، جبکہ مشہور اداکار شمعون عباسی اُن کے بھتیجے ہیں۔
اداکار شمعون عباسی نے اپنے چچا کے انتقال کی خبر سوشل میڈیا پر شیئر کرتے ہوئے گہرے دکھ کا اظہار کیا۔
انہوں نے اپنے پیغام میں لکھا “میرے پیارے چچا آج ہمیں چھوڑ کر چلے گئے، براہِ کرم ان کی مغفرت کے لیے سورۃ الفاتحہ پڑھیں۔”
فنکار برادری نے عزیر عباسی کو ایک نفیس انسان، شفیق بزرگ اور علم و فن کے قدردان کے طور پر یاد کیا۔ ان کی خدمات پاکستانی ٹی وی ڈرامے کی تاریخ کا روشن باب ہیں۔
