کولوِزی – کانگو میں اس وقت ڈرامائی صورتحال پیدا ہوئی جب وزیرِ معدنیات لوئیس واتوم کابامبا اور ان کے وفد کو لے جانے والا سرکاری طیارہ لینڈنگ کے فوراً بعد حادثے کا شکار ہو گیا، تاہم معجزانہ طور پر تمام مسافر اور عملہ محفوظ رہے۔ عالمی میڈیا کے مطابق طیارہ صوبہ لوآلابا کے شہر کولوِزی ایئرپورٹ پر اترتے ہی اچانک بے قابو ہوا، رن وے سے پھسل کر تباہ ہوا اور چند ہی لمحوں میں اس میں آگ بھڑک اٹھی۔
حکام کے مطابق لینڈنگ کے دوران طیارے کا توازن بگڑا جس کے نتیجے میں وہ رن وے سے باہر جا نکلا۔ حادثہ اتنا شدید تھا کہ طیارہ مکمل طور پر تباہ ہو گیا، تاہم فوری ردعمل کے باعث مسافر اور عملہ آگ بھڑکنے سے پہلے ہی طیارے سے نکلنے میں کامیاب ہو گئے، جسے حکام نے "خالص معجزہ” قرار دیا۔
ایئرپورٹ انتظامیہ نے واقعے کی تحقیقات شروع کر دی ہیں جبکہ ابتدائی معلومات کے مطابق طیارے میں فنی خرابی کا شبہ ظاہر کیا جا رہا ہے۔ واقعے کے بعد ایئرپورٹ پر ہنگامی حالت نافذ کر دی گئی اور ریسکیو ٹیموں نے جائے حادثہ کو گھیرے میں لے لیا۔
