کراچی: انٹرنیشنل کرکٹ کونسل (آئی سی سی) ٹی ٹوئنٹی ورلڈ کپ 2026 کے گروپس اور پاک بھارت مقابلے سے متعلق اہم تفصیلات سامنے آگئیں، جبکہ ٹورنامنٹ کا باضابطہ شیڈول 25 نومبر کو جاری کیا جائے گا۔
میڈیا رپورٹس کے مطابق 20 ٹیموں کو 4 گروپس میں 5، 5 ٹیموں کے ساتھ تقسیم کیا جائے گا اور ہر گروپ سے دو بہترین ٹیمیں سپر 8 مرحلے کے لیے کوالیفائی کریں گی۔ پاکستان اور بھارت ایک ہی گروپ میں شامل ہوں گے، جبکہ امکان ہے کہ نیدرلینڈز، نمیبیا اور یو ایس اے بھی اسی گروپ کا حصہ ہوں۔ دونوں روایتی حریف 15 فروری کو کولمبو میں مدمقابل ہوں گے۔
مشترکہ میزبان سری لنکا کے گروپ میں آسٹریلیا، زمبابوے، آئرلینڈ اور عمان کی ٹیمیں شامل ہو سکتی ہیں، جبکہ انگلینڈ، ویسٹ انڈیز، بنگلادیش، نیپال اور اٹلی پر مشتمل گروپ بھی تشکیل دیے جانے کا امکان ہے۔ ایک دیگر ممکنہ گروپ جنوبی افریقہ، نیوزی لینڈ، افغانستان، یو اے ای اور کینیڈا پر مشتمل ہوگا۔
ٹی ٹوئنٹی ورلڈ کپ 7 فروری سے 8 مارچ تک جاری رہے گا۔ بھارت میں میچز ممبئی، کولکتہ، چنائی، دہلی اور احمد آباد میں ہوں گے جبکہ سری لنکا میں مقابلے کولمبو اور کینڈی میں شیڈول کیے جائیں گے۔ پاکستان ٹیم اپنے تمام میچز سری لنکا میں کھیلے گی۔
فائنل کے لیے احمد آباد کو منتخب کیا گیا ہے، تاہم پاکستان کے فائنل میں پہنچنے کی صورت میں فیصلہ کن معرکہ کولمبو میں منتقل کر دیا جائے گا۔ سیمی فائنلز ممبئی اور کولکتہ میں ہوں گے، تاہم پاکستان کی سیمی فائنل تک رسائی کی صورت میں یہ میچ سری لنکا میں ہی کھیلا جائے گا۔
