استنبول – کیتھولک چرچ کے سربراہ پوپ لیوسیٹ نے اتوار کو لبنان کے لیے روانہ ہو کر ایک ایسے ملک میں امن کی اپیل کی، جو اسرائیلی فضائی حملوں کا مسلسل ہدف ہے۔ یہ ان کے پہلے غیر ملکی دورے کا دوسرا اور آخری مرحلہ ہے۔
پوپ لیو استنبول سے بیروت پہنچیں گے، جہاں وہ صدر اور وزیر اعظم سے ملاقاتیں کریں گے اور قومی رہنماؤں سے خطاب کریں گے۔ لبنان میں ان کا دورہ پانچ شہروں اور قصبوں میں شیڈول ہے، جس کے دوران وہ 2020 میں بیروت بندرگاہ پر ہونے والے ہولناک دھماکے کی جگہ پر دعا کریں گے اور واٹر فرنٹ پر ایک عوامی ماس کی قیادت کریں گے۔
پوپ کے سفر کا مقصد نہ صرف لبنان میں امن کا پیغام دینا ہے بلکہ اسرائیل اور حزب اللہ کے درمیان جاری کشیدگی کے دوران انسانی ہمدردی اور پناہ گزینوں کے حقوق کے تحفظ کی اہمیت پر بھی روشنی ڈالنا ہے۔ لبنان میں تقریباً 10 لاکھ شامی اور فلسطینی پناہ گزین مقیم ہیں اور ملک معاشی بحران سے گزر رہا ہے۔
حزب اللہ کے رہنما نعیم قاسم نے کہا کہ وہ امید کرتے ہیں کہ پوپ کا دورہ اسرائیلی حملوں کو کم کرنے میں مددگار ثابت ہوگا۔ لبنان کی مختلف مذہبی برادریوں نے بھی اس دورے کا خیرمقدم کیا، اور سرکردہ دروز عالم نے اسے "امید کی کرن” قرار دیا۔
پوپ لیو نے ہفتے کے روز استنبول میں نیلی مسجد کا دورہ کیا، جہاں انہوں نے احترام کے طور پر اپنے جوتے اتارے، اور آرتھوڈوکس مسیحی عبادت میں بھی شرکت کی، جس کی قیادت استنبول کے ایکومینیکل پیٹریارک بارتھولومیو نے کی۔
70 سالہ پوپ لیو اپنے لبنان کے دورے میں پرہجوم پروگرام کے تحت بیروت کے نفسیاتی ہسپتال اور دیگر اہم مقامات کا بھی دورہ کریں گے، جہاں مقامی لوگ ان کی آمد کا بے صبری سے انتظار کر رہے ہیں۔
