کوئٹہ — پاکستانی ویٹ لفٹر کاشف ریحان نے سری لنکا میں منعقدہ ورلڈ پاور لفٹنگ مقابلے میں شاندار کارکردگی دکھاتے ہوئے گولڈ میڈل اپنے نام کر لیا۔ کاشف ریحان نے 160 کلوگرام ڈیڈلفٹ اور 150 کلوگرام اسکواڈ کے ساتھ مجموعی طور پر 310 کلوگرام وزن اٹھا کر پاکستان کا پرچم بلند کیا۔
کولمبو میں 27 سے 30 نومبر تک ہونے والے ایونٹ میں 350 سے زائد ویٹ لفٹرز نے مختلف ممالک کی نمائندگی کی۔ کاشف ریحان اس مقابلے میں شرکت کے لیے ادھار پیسے لے کر سری لنکا گئے تھے۔
اس سے قبل بھی وہ قطر میں منعقدہ ایشین ماسٹرز ویٹ لفٹنگ چیمپئن شپ میں گولڈ میڈل جیت چکے ہیں، جہاں انہیں حکومتی تعاون نہ ملنے کے باعث اپنی گاڑی فروخت کرکے ایونٹ میں شرکت کرنا پڑی تھی۔
کاشف ریحان کے مطابق انہیں دوحہ اور کولمبو، دونوں عالمی مقابلوں کے اخراجات خود برداشت کرنا پڑے، جبکہ مالی مشکلات کے باوجود انہوں نے ملک کے لیے اعزازات جیت کر پاکستان کا نام عالمی سطح پر نمایاں کیا۔
