برطانوی شاہی خاندان میں ایک اور اہم پیش رفت سامنے آئی ہے جہاں کنگ چارلس نے اپنے چھوٹے بھائی اینڈریو ماؤنٹ بیٹن وِنڈسر سے آخری شاہی اعزازات بھی باضابطہ طور پر واپس لے لیے ہیں۔ اس فیصلے کے بعد شہزادہ اینڈریو کسی بھی شاہی خطاب یا اعزاز کے حامل نہیں رہے۔
رپورٹس کے مطابق اینڈریو کو نہ صرف آرڈر آف دی گارٹر کی رکنیت سے محروم کر دیا گیا ہے بلکہ نائٹ آف دی گرانڈ کراس آف دی رائل وکٹوریہ آرڈر کا اعزاز بھی واپس لے لیا گیا ہے۔ آرڈر آف دی گارٹر برطانیہ کا قدیم ترین اور باوقار اعزاز تصور کیا جاتا ہے، جبکہ نائٹ آف دی گرانڈ کراس بادشاہ کے لیے ذاتی خدمات انجام دینے والی شخصیات کو دیا جاتا ہے۔ دونوں اعزازات ان کے سرکاری ریکارڈ سے بھی حذف کر دیے گئے ہیں۔ اس سے قبل ایک ماہ پہلے ہی ان سے “پرنس” کا خطاب بھی واپس لیا جا چکا ہے۔
ذرائع کے مطابق یہ فیصلہ کنگ چارلس اور شہزادہ ولیم کی مشاورت سے کیا گیا، اور اینڈریو نے بھی اس اقدام پر اتفاق ظاہر کیا۔ شاہی حلقوں کے مطابق بادشاہ اس فیصلے سے مطمئن ہیں۔ یہ بھی امکان ہے کہ رائل نیوی جلد ہی انہیں وائس ایڈمرل کے عہدے سے سبکدوش کر سکتی ہے۔
کچھ ہفتے قبل کنگ چارلس نے اینڈریو کو وہ گھر بھی خالی کرنے کا حکم دیا تھا جہاں وہ دو دہائیوں سے زیادہ عرصہ رہائش پذیر تھے۔ تازہ فیصلوں کے بعد اینڈریو نہ ڈیوک آف یارک کہلائیں گے، نہ پرنس، اور نہ ہی شاہی اشرافیہ کی فہرست میں شمار ہوں گے۔
شاہی ماہرین کا کہنا ہے کہ مستقبل میں انہیں بادشاہ یا دیگر سینئر شاہی افراد کے ساتھ کسی عوامی تقریب میں نہیں دیکھا جائے گا، تاہم روایت کے مطابق وہ اب بھی تختِ برطانیہ کی وراثتی لائن میں آٹھویں نمبر پر موجود ہیں۔
