انڈر 19 کرکٹ ورلڈ کپ میں شاندار کارکردگی کا مظاہرہ کرتے ہوئے انگلینڈ اور افغانستان کی ٹیموں نے سیمی فائنل کے لیے کوالیفائی کر لیا۔
گروپ ٹو کے اہم مقابلے میں انگلینڈ نے نیوزی لینڈ کو 65 رنز سے شکست دے کر آخری چار ٹیموں میں جگہ بنا لی۔ 235 رنز کے ہدف کے تعاقب میں کیوی ٹیم 169 رنز پر ڈھیر ہو گئی۔
انگلینڈ کی فتح میں مینی لمسڈن نے مرکزی کردار ادا کیا، جنہوں نے شاندار باؤلنگ کرتے ہوئے 5 وکٹیں حاصل کیں۔ اس سے قبل انگلش ٹیم نے پہلے بیٹنگ کرتے ہوئے مقررہ اوورز میں 234 رنز بنائے، جس میں بین میس 53 رنز کے ساتھ نمایاں رہے۔
دوسری جانب گروپ ون میں افغانستان نے زبردست کھیل پیش کرتے ہوئے آئرلینڈ کو 191 رنز سے شکست دے کر سیمی فائنل کا ٹکٹ حاصل کر لیا۔ اس گروپ سے آسٹریلیا کی ٹیم پہلے ہی سیمی فائنل میں جگہ بنا چکی ہے۔
انڈر 19 ورلڈ کپ کے سیمی فائنلز میں اب مضبوط ٹیموں کے درمیان دلچسپ اور سنسنی خیز مقابلوں کی توقع کی جا رہی ہے۔
About The Author
