دنیا جنگل کے قانون کی طرف جا رہی ہے، چینی صدر شی جن پنگ کا انتباہ -

چین کے صدر Xi Jinping نے خبردار کیا ہے کہ عالمی نظام تیزی سے کمزور ہو رہا ہے اور دنیا دوبارہ ’’جنگل کے قانون‘‘ کی طرف بڑھ رہی ہے، جہاں طاقتور کی حکمرانی قانون پر غالب آ سکتی ہے۔

چینی سرکاری خبر رساں ایجنسی کے مطابق یہ ریمارکس انہوں نے ہسپانوی وزیر اعظم Pedro Sánchez سے بیجنگ میں ملاقات کے دوران دیے، جو ان دنوں چین کے سرکاری دورے پر ہیں۔ ملاقات میں دونوں رہنماؤں نے عالمی صورتحال، خصوصاً مشرقِ وسطیٰ میں جاری کشیدگی پر تفصیلی تبادلہ خیال کیا۔

شی جن پنگ نے کہا کہ دنیا اس وقت ایک ہنگامہ خیز مرحلے سے گزر رہی ہے جہاں قانون کی حکمرانی اور طاقت کی حکمرانی کے درمیان واضح کشمکش نظر آ رہی ہے۔ ان کا کہنا تھا کہ اگر عالمی برادری نے بروقت اقدامات نہ کیے تو بین الاقوامی نظام مزید عدم استحکام کا شکار ہو سکتا ہے۔

چینی صدر نے اس موقع پر اسپین کے ساتھ دوطرفہ تعاون کو مزید مضبوط بنانے پر زور دیتے ہوئے کہا کہ دونوں ممالک کو مل کر ایسے عالمی نظام کے دفاع کے لیے کام کرنا چاہیے جو بین الاقوامی قوانین، خودمختاری کے احترام اور کثیرالجہتی اصولوں پر مبنی ہو۔

انہوں نے اس عزم کا اظہار بھی کیا کہ چین عالمی سطح پر امن، استحکام اور قانون کی حکمرانی کے فروغ کے لیے اپنی کوششیں جاری رکھے گا تاکہ دنیا کو ایک بار پھر طاقت کے بجائے اصولوں کی بنیاد پر چلنے والے نظام کی طرف واپس لایا جا سکے۔