ایران کے صدر مسعود پزشکیان نے اعلان کیا ہے کہ 5 مئی کو صحرائے طبس میں امریکا کی تاریخی شکست کی برسی منائی جائے گی، جسے ایران اپنی عسکری اور نظریاتی تاریخ کا اہم باب قرار دیتا ہے۔
سوشل میڈیا پر جاری اپنے بیان میں ایرانی صدر نے کہا کہ طبس کا واقعہ اس بات کی علامت ہے کہ “اللہ کی مدد اور نصرت نے امریکی غرور کو خاک میں ملا دیا”، اور یہ واقعہ آج بھی ایران کے لیے حوصلہ اور مزاحمت کی علامت ہے۔
انہوں نے مزید کہا کہ موجودہ حالات میں بھی اسی نوعیت کی صورتحال دیکھنے کو مل رہی ہے، اور جنوبی اصفہان میں پیش آنے والے حالیہ واقعات کو انہوں نے “ایک اور طبس” سے تعبیر کیا، جسے دشمن کی ناکامی کی واضح مثال قرار دیا۔
صدر پزشکیان کا کہنا تھا کہ جس طرح صحرائے طبس میں قدرتی عوامل دشمن کے خلاف ڈھال بنے، اسی طرح آج بھی ایران کو “الٰہی حفاظت” حاصل ہے۔ ان کے مطابق ایسے واقعات دنیا کی بڑی طاقتوں کے لیے ایک سبق ہیں کہ طاقت کے باوجود نتائج ہمیشہ ان کے حق میں نہیں ہوتے۔
واضح رہے کہ صحرائے طبس کا حوالہ عام طور پر Operation Eagle Claw سے جوڑا جاتا ہے، جو 1980 میں امریکا کی جانب سے ایران میں یرغمالیوں کو چھڑانے کے لیے کی گئی ایک ناکام فوجی کارروائی تھی۔
ایرانی قیادت اس واقعے کو اپنی مزاحمتی تاریخ اور خودمختاری کی علامت کے طور پر پیش کرتی ہے، اور ہر سال اس کی برسی کو قومی بیانیے کا حصہ بنایا جاتا ہے، خاص طور پر ایسے اوقات میں جب خطے میں کشیدگی عروج پر ہو۔
About The Author
