پاکستان سپر لیگ (پی ایس ایل) 11 کے 38ویں میچ میں پشاور زلمی نے شاندار بیٹنگ کا مظاہرہ کرتے ہوئے لاہور قلندرز کو جیت کے لیے 200 رنز کا ہدف دے دیا۔
قذافی اسٹیڈیم لاہور میں کھیلے گئے اس میچ میں لاہور قلندرز نے ٹاس جیت کر پہلے فیلڈنگ کا فیصلہ کیا، تاہم پشاور زلمی نے مقررہ 20 اوورز میں 4 وکٹوں کے نقصان پر 199 رنز اسکور کیے۔
زلمی کی جانب سے مائیکل بریسویل نے جارحانہ بیٹنگ کرتے ہوئے 83 رنز کی دھواں دار اننگز کھیلی اور ٹیم کے بڑے اسکور کی بنیاد رکھی۔ کپتان بابر اعظم نے بھی ذمہ دارانہ بیٹنگ کرتے ہوئے 59 رنز بنائے۔ دیگر بلے بازوں میں جیمز ونس 10 اور کوشل مینڈس 7 رنز بنا کر آؤٹ ہوئے، جبکہ افتخار احمد 27 رنز اور عبدالصمد 4 رنز کے ساتھ ناٹ آؤٹ رہے۔
لاہور قلندرز کی جانب سے بولنگ میں کپتان شاہین شاہ آفریدی اور حارث رؤف نے عمدہ کارکردگی دکھائی اور دونوں نے 2، 2 وکٹیں حاصل کیں، تاہم وہ زلمی کے جارحانہ اسکور کو روکنے میں مکمل طور پر کامیاب نہ ہو سکے۔
اب لاہور قلندرز کو پلے آف کی دوڑ میں رہنے کے لیے 200 رنز کا مشکل ہدف حاصل کرنا ہوگا، جو اس میچ کو انتہائی اہم اور دلچسپ بنا رہا ہے۔
About The Author
