برطانیہ کے بادشاہ شاہ چارلس سوم نے وائٹ ہاؤس میں اپنے اعزاز میں دیے گئے سرکاری عشائیے سے خطاب کے دوران عالمی امن، تاریخی تعلقات اور سفارتی تعاون پر زور دیتے ہوئے اپنی تقریر کا اختتام عظیم ڈرامہ نگار ولیم شیکسپیئر کے اقتباس سے کیا۔
انہوں نے کہا کہ ایک ایسے وقت میں جب دنیا میں امن کی تلاش پہلے سے زیادہ نازک ہو چکی ہے، شیکسپیئر کی دانش ہمیں امن کی اہمیت یاد دلاتی ہے۔ بادشاہ نے شیکسپیئر کے الفاظ کا حوالہ دیتے ہوئے نرم اور پائیدار امن کی ضرورت پر زور دیا۔
اپنی تقریر میں بادشاہ نے میزبان ڈونلڈ ٹرمپ کا شکریہ ادا کرتے ہوئے عشائیے کو "شاندار” قرار دیا اور طنزیہ انداز میں اسے تاریخی بوسٹن ٹی پارٹی سے بہتر قرار دیا، جب امریکی نوآبادیاتی باشندوں نے برطانوی چائے سمندر میں پھینک دی تھی۔
تقریب کے دوران بادشاہ نے صدر ٹرمپ کو رائل نیوی کی آبدوز HMS Trump کی گھنٹی بطور تحفہ پیش کی، جسے انہوں نے دونوں ممالک کے درمیان مشترکہ تاریخ اور روشن مستقبل کی علامت قرار دیا۔ انہوں نے مزاحیہ انداز میں کہا کہ اگر کبھی رابطے کی ضرورت ہو تو "ہمیں گھنٹی دے دیجئے”۔
بادشاہ نے اپنی تقریر میں دفاعی اتحادوں کی اہمیت پر بھی روشنی ڈالی، خصوصاً نیٹو اور آکس کو موجودہ عالمی چیلنجز سے نمٹنے کے لیے ناگزیر قرار دیا۔
انہوں نے امریکا اور برطانیہ کے تاریخی تعلقات کو اجاگر کرتے ہوئے سابق برطانوی وزیر اعظم ونسٹن چرچل اور امریکی صدر فرینکلن ڈی روزویلٹ کے درمیان ایک دلچسپ واقعہ بھی سنایا، جسے حاضرین نے خوب سراہا۔
بادشاہ نے اپنی والدہ ملکہ الزبتھ دوم کے 1957 کے دورۂ امریکا کا حوالہ دیتے ہوئے کہا کہ دونوں ممالک کے تعلقات ماضی میں بھی بحرانوں سے گزر کر مضبوط ہوئے اور آج بھی یہ رشتہ عالمی استحکام کے لیے انتہائی اہم ہے۔
تقریر کے دوران بادشاہ نے ہلکے پھلکے انداز میں امریکا اور یورپ کے تاریخی کردار پر بھی تبصرہ کیا اور کہا کہ اگر امریکا نہ ہوتا تو شاید یورپ کی زبان مختلف ہوتی، تاہم اگر برطانیہ نہ ہوتا تو امریکا میں فرانسیسی بولی جا رہی ہوتی۔
اپنے خطاب کے آغاز میں انہوں نے وائٹ ہاؤس کی تزئین و آرائش پر بھی مزاحیہ جملے کہے اور 1814 میں برطانوی افواج کی جانب سے وائٹ ہاؤس کو آگ لگانے کے تاریخی واقعے کا حوالہ دیا۔
تقریر کے اختتام پر شاہ چارلس نے صدر ٹرمپ اور ان کے خاندان کے برطانیہ سے تعلقات کا ذکر کرتے ہوئے ان کی کامیابیوں کو سراہا اور دونوں ممالک کے درمیان "خصوصی تعلقات” کو مزید مضبوط بنانے کے عزم کا اعادہ کیا۔
قبل ازیں برطانیہ کے بادشاہ شاہ چارلس سوم نے پارلیمنٹ سے اپنے اہم اور غیر معمولی خطاب میں عالمی سیاست، جمہوریت اور بین الاقوامی اتحاد سے متعلق کئی اہم نکات اٹھائے، جنہوں نے امریکی و برطانوی تعلقات اور عالمی منظرنامے پر گہری روشنی ڈالی۔
خطاب کا آغاز انہوں نے موجودہ عالمی حالات میں پائی جانے والی “بڑی غیر یقینی صورتحال” کے اعتراف سے کیا۔ انہوں نے مشرق وسطیٰ اور یورپ میں جاری تنازعات کا حوالہ دیتے ہوئے سیاسی تشدد کے بڑھتے رجحان کو جمہوریت کے لیے خطرہ قرار دیا۔ اس موقع پر انہوں نے تاریخی حوالہ دیتے ہوئے کہا کہ امریکی انقلاب 1776 کی روح کو مدنظر رکھتے ہوئے یہ تسلیم کرنا ضروری ہے کہ امریکا اور برطانیہ ہمیشہ ایک رائے پر متفق نہیں رہے، تاہم جب دونوں ممالک ہم آہنگ ہوتے ہیں تو عالمی سطح پر مثبت کردار ادا کر سکتے ہیں۔
اپنے خطاب کے دوسرے اہم حصے میں بادشاہ نے جمہوری نظام میں طاقت کے توازن پر زور دیا۔ انہوں نے میگنا کارٹا کا حوالہ دیتے ہوئے کہا کہ ایگزیکٹو اختیارات کو چیک اینڈ بیلنس کے تابع ہونا چاہیے، جو بعد ازاں امریکی آئین کا بنیادی اصول بن گیا۔ اس بیان کو خاص طور پر امریکی ڈیموکریٹ اراکین کی جانب سے بھرپور پذیرائی ملی، جو حالیہ برسوں میں صدارتی اختیارات پر تنقید کرتے رہے ہیں۔
تیسرے نکتے میں شاہ چارلس نے ٹرانس اٹلانٹک اتحاد اور دفاعی شراکت داری کی اہمیت اجاگر کی۔ انہوں نے ہنری کسنجر کا حوالہ دیتے ہوئے امریکا اور یورپ کے درمیان تعلقات کو عالمی استحکام کے لیے ناگزیر قرار دیا اور نیٹو کے کردار کو سراہا، جو 9/11 حملوں کے بعد پہلی بار اجتماعی دفاع کے لیے متحرک ہوا تھا۔ بادشاہ نے اپنی بحری خدمات کا ذکر کرتے ہوئے سیکیورٹی اور انٹیلی جنس تعاون کو دونوں خطوں کے لیے اہم قرار دیا، جبکہ موسمیاتی تبدیلی کو بھی ایک مشترکہ چیلنج کے طور پر پیش کیا۔
تاہم خطاب کے دوران ایک نمایاں پہلو یہ رہا کہ بادشاہ نے بدنام زمانہ شخصیت جیفری ایپسٹین یا ان کے متاثرین کا براہ راست ذکر نہیں کیا۔ اگرچہ انہوں نے عمومی طور پر “برائی کے متاثرین” کی مدد کی ضرورت کا ذکر کیا، لیکن ناقدین کے مطابق یہ حوالہ کافی مبہم تھا۔ یاد رہے کہ ایپسٹین کیس سے متعلق حالیہ انکشافات میں برطانوی شاہی خاندان کے رکن پرنس اینڈریو کا نام بھی سامنے آ چکا ہے، جس کے باعث اس معاملے کی حساسیت مزید بڑھ گئی ہے۔
خطاب کے اختتام پر شاہ چارلس نے امریکا کے عالمی کردار پر زور دیتے ہوئے کہا کہ امریکا کے الفاظ ہی نہیں بلکہ اس کے اقدامات بھی عالمی سطح پر گہرے اثرات رکھتے ہیں۔ ان کے اس بیان کو بعض مبصرین نے ایک محتاط سفارتی پیغام قرار دیا، جو موجودہ عالمی سیاسی ماحول میں ذمہ دارانہ قیادت کی ضرورت کو اجاگر کرتا ہے۔
About The Author
