عالمی اسکواش چیمپئن شپ میں پاکستان کے دونوں کھلاڑیوں کا سفر دوسرے مرحلے میں ہی ختم ہوگیا۔ مصر میں جاری اکہتر ہزار ڈالر مالیت کی چیمپئن شپ میں پاکستانی کھلاڑی سخت مقابلوں کے بعد ایونٹ سے باہر ہوگئے۔
پاکستان کے عالمی درجہ بندی میں اٹھائیسویں نمبر پر موجود نور زمان کو مصر کے عالمی نمبر آٹھ اور عالمی جونیئر چیمپئن محمد ذکریا نے صفر کے مقابلے میں تین گیمز سے شکست دی۔
مصری کھلاڑی نے پہلا گیم چار کے مقابلے میں گیارہ، دوسرا گیم پانچ کے مقابلے میں گیارہ جبکہ تیسرا گیم بھی پانچ کے مقابلے میں گیارہ سے جیت کر کامیابی اپنے نام کی۔ اس فتح کے ساتھ محمد ذکریا نے اگلے مرحلے کے لیے کوالیفائی کرلیا۔
دوسری جانب پاکستان کے عالمی نمبر چھیالیس اشعب عرفان بھی انگلینڈ کے ناتھن لیک کے خلاف کامیابی حاصل نہ کرسکے اور صفر کے مقابلے میں تین گیمز سے شکست کھا گئے۔
ناتھن لیک نے پہلا گیم تین کے مقابلے میں گیارہ، دوسرا گیم بارہ کے مقابلے میں چودہ اور تیسرا گیم دس کے مقابلے میں بارہ سے جیت کر کوارٹر فائنل میں جگہ بنالی۔
پاکستانی کھلاڑیوں کی ایونٹ سے جلد رخصتی کے بعد شائقین اسکواش میں مایوسی پائی جارہی ہے، تاہم نوجوان کھلاڑیوں کی شرکت کو مستقبل کے لیے مثبت پیش رفت قرار دیا جا رہا ہے۔
About The Author
