نیشنل ڈیزاسٹر مینجمنٹ اتھارٹی نے آئندہ 12 سے 24 گھنٹوں کے دوران ملک کے بیشتر علاقوں میں تیز ہواؤں، گرج چمک کے ساتھ بارش اور ژالہ باری کا الرٹ جاری کر دیا ۔ شہریوں کو غیر ضروری سفر سے گریز اور خصوصی احتیاط برتنے کی ہدایت کی گئی ہے۔
ترجمان این ڈی ایم اے کے مطابق وفاقی دارالحکومت اسلام آباد، پنجاب، خیبرپختونخوا، سندھ اور بلوچستان کے مختلف اضلاع میں تیز ہواؤں اور گرج چمک کے ساتھ بارش متوقع ہے۔ چند مقامات پر ژالہ باری کا بھی امکان ہے۔ گلگت بلتستان اور آزاد کشمیر میں بھی بادل برسیں گے۔
بڑھتے ہوئے درجہ حرارت کے باعث گلیشیئرز پگھلنے اور برفانی جھیلیں پھٹنے سے سیلابی ریلوں اور لینڈ سلائیڈنگ کا شدید خطرہ موجود ہے۔ شہریوں کو گلیشیائی جھیلوں کے قریب جانے اور خطرے والے مقامات پر قیام سے منع کیا گیا ہے۔
دوسری جانب ملک کے جنوبی علاقوں میں تیز ہواؤں اور ممکنہ ژالہ باری کے باعث کمزور تعمیرات، سولر پینلز اور گاڑیوں کو نقصان پہنچنے کا خدشہ ظاہر کیا گیا ہے۔
این ڈی ایم اے کے مطابق پہاڑی علاقوں میں بارش کے باعث سفر میں شدید مشکلات پیش آسکتی ہیں، لہذا شہری دورانِ سفر احتیاطی تدابیر اختیار کریں۔
About The Author
