خلیل الرحمٰن قمر کی مومنہ اقبال تنازع پر تنقید، ’لِو اِن ریلیشن شپ کلچر‘ پر سوالات اٹھا دیے

معروف شاعر و ڈرامہ نگار خلیل الرحمٰن قمر نے اداکارہ مومنہ اقبال اور ثاقب چدھڑ کے درمیان جاری تنازع پر اظہارِ خیال کرتے ہوئے معاشرے میں بڑھتے ہوئے “لِو اِن ریلیشن شپ” کلچر پر شدید تنقید کی ہے۔

حال ہی میں ایک پوڈکاسٹ گفتگو کے دوران خلیل الرحمٰن قمر نے کہا کہ اگر اس قسم کے تعلقات کو معمول بنا لیا گیا تو پھر پاکستان کے نام سے “اسلامی جمہوریہ” کا لفظ ہٹا دینا چاہیے۔

انہوں نے کہا کہ نوجوان نسل کو غلط راستہ دکھانے کے بجائے شادی جیسے مضبوط اور باوقار رشتے کو بچانے کی ضرورت ہے۔

خلیل الرحمٰن قمر کے مطابق اس نوعیت کے تعلقات صرف جذباتی نہیں ہوتے بلکہ اکثر مالی مفادات بھی اس میں شامل ہوتے ہیں۔ انہوں نے کہا کہ اگر واقعی کوئی تعلق موجود تھا تو اسے عزت اور وقار کے ساتھ ختم ہونا چاہیے تھا، جبکہ اگر معاملہ مالی لین دین کا تھا تو اسے نجی سطح پر حل کیا جانا چاہیے تھا۔

انہوں نے ثاقب چدھڑ کو بھی تنقید کا نشانہ بناتے ہوئے کہا کہ اس معاملے میں دونوں فریق برابر کے ذمے دار ہیں اور ذاتی معاملات کو عوامی سطح پر لانا “بچگانہ حرکت” ہے۔