مکہ مکرمہ میں غلافِ کعبہ کی سالانہ تبدیلی کی تیاریاں مکمل کر لی گئی ہیں، جبکہ خادم الحرمین الشریفین کی نیابت میں نیا غلافِ کعبہ (کسوہ) باضابطہ طور پر کلید بردارِ کعبہ کے حوالے کر دیا گیا۔
سعودی حکام کے مطابق غلافِ کعبہ کی تبدیلی کے موقع پر ہر سال کی طرح اس بار بھی ایک روح پرور اور پروقار تقریب منعقد کی جائے گی، جس میں خانہ کعبہ پر نیا کسوہ چڑھایا جائے گا۔
واضح رہے کہ نئی روایت کے تحت غلافِ کعبہ کو ہجری سال کے آغاز یعنی یکم محرم الحرام کو تبدیل کیا جاتا ہے۔ اس مقدس عمل کو دنیا بھر کے مسلمان عقیدت اور احترام کی نگاہ سے دیکھتے ہیں۔
غلافِ کعبہ کی تیاری ایک انتہائی پیچیدہ اور باریک فن کا شاہکار سمجھی جاتی ہے۔ اس کی تیاری میں سیکڑوں کلوگرام خالص ریشم استعمال کیا جاتا ہے، جبکہ قرآنی آیات اور اسلامی نقوش کی کڑھائی کے لیے چاندی اور سونے سے ملمع سنہری دھاگے استعمال کیے جاتے ہیں۔
ہر سال نیا غلاف تیار کرنے کے لیے ماہر کاریگروں کی ایک بڑی ٹیم خصوصی فیکٹری میں کئی ماہ تک کام کرتی ہے، جس کے بعد تیار شدہ کسوہ خانہ کعبہ پر نصب کیا جاتا ہے۔
غلافِ کعبہ کی تبدیلی نہ صرف ایک مذہبی روایت ہے بلکہ امت مسلمہ کے لیے روحانی اہمیت کا حامل ایک عظیم اور تاریخی موقع بھی تصور کیا جاتا ہے۔
About The Author
