بھارت کی ریاست اتراکھنڈ کے ضلع تہری گڑھوال میں ایک 18 سالہ دلت نوجوان کو اپرذات کی لڑکی سے تعلق بنانے پر ہلاک کردیاگیا جس پر علاقے میں شدید غم و غصے کی لہر دوڑا دی ہے۔ اہل خانہ اور مقامی دیہاتیوں نے مطالبہ کیا ہے کہ تمام ملزمان کی گرفتاری تک مقتول کی آخری رسومات ادا نہیں کی جائیں گی۔
رپورٹس کے مطابق مقتول کی شناخت کیتن لال کے نام سے ہوئی ہے، جو ضلع کے پرتاپ گڑھ بلاک کے گاؤں کھول گڑھ کا رہائشی تھا۔ اہل خانہ کا کہنا ہے کہ نوجوان گزشتہ چند ماہ سے ایک لڑکی کے ساتھ رابطے میں تھا۔ دعویٰ کیا گیا ہے کہ لڑکی کی جانب سے بلائے جانے پر جب کیتن اپنے ایک دوست کے ہمراہ وہاں پہنچا تو انہیں ایک کمرے میں بند کر دیا گیا۔
مقتول کے والد دھن پال لال کے مطابق بعد ازاں متعدد افراد نے مبینہ طور پر نوجوان پر لاٹھیوں اور لوہے کی سلاخوں سے حملہ کیا۔ اہل خانہ کا کہنا ہے کہ تشدد کے دوران کیتن کو شدید جسمانی اذیت کا نشانہ بنایا گیا جس کے نتیجے میں اس کے جسم پر گہرے زخم آئے۔
کیتن لال کو تشویشناک حالت میں اسپتال منتقل کیا گیا، تاہم وہ دورانِ علاج زخموں کی تاب نہ لاتے ہوئے دم توڑ گیا۔ واقعے کے بعد مقامی افراد اور رشتہ داروں نے اسپتال کے باہر احتجاج کیا اور الزام عائد کیا کہ پولیس تمام مبینہ حملہ آوروں کو گرفتار کرنے میں ناکام رہی ہے۔
مظاہرین نے مطالبہ کیا ہے کہ واقعے میں ملوث تمام افراد کے خلاف سخت قانونی کارروائی کی جائے اور انصاف کی فراہمی کو یقینی بنایا جائے۔ دوسری جانب پولیس کی جانب سے واقعے کی تحقیقات جاری ہیں جبکہ علاقے میں صورتحال پر گہری نظر رکھی جا رہی ہے۔
About The Author
