پاکستان ایکس سروس مین سوسائٹی کے اراکین پوری قوم سے پرزور اپیل کرتے ہیں کہ خدارا اپنی سیاسی مخالفت، اختلافِ رائے یا ذاتی مفادات کی خاطر وطنِ عزیز پاکستان کے عظیم شہداء اور غازیوں کی لازوال قربانیوں کو ہرگز متنازع نہ بنایا جائے۔
شہدائے پاکستان پوری قوم کا مشترکہ سرمایہ، قومی وقار کی علامت اور ہماری آزادی و سلامتی کے محافظ ہیں۔ ان کی عزت و تکریم ہر پاکستانی پر فرض ہے اور یہی قومی غیرت اور دینی اقدار کا تقاضا بھی ہے۔
قربانی کا اصل مفہوم
یہ تاثر دینا کہ پاک افواج کے جوان صرف تنخواہ کے عوض اپنی جانوں کا نذرانہ پیش کرتے ہیں، شہداء کی عظیم قربانیوں کی روح کے منافی ہے۔
شہادت کسی مالی معاوضے یا دنیاوی مفاد کا نام نہیں بلکہ فرض شناسی، حب الوطنی، ایمان، ایثار، جرات، بہادری اور وطن سے بے لوث محبت کا بلند ترین مظہر ہے۔
پاک افواج کا ہر سپاہی، سیلر، ہواباز اور افسر ہر لمحہ وطن کے دفاع کے لیے اپنی جان ہتھیلی پر رکھے تیار رہتا ہے۔ خواہ اسے شہادت نصیب ہو یا نہ ہو، وہ مسلسل سخت ترین تربیت، نظم و ضبط، مشقوں اور ہر قسم کے موسمی و جنگی حالات میں دفاعِ وطن کی ذمہ داریاں انتہائی جانفشانی سے انجام دیتا ہے۔
تپتے صحراؤں، برف پوش پہاڑوں، دشوار گزار جنگلات، تلاطم خیز سمندروں، پرخطر فضاؤں اور سرحدی چوکیوں پر خدمات انجام دینا ان کے معمول کا حصہ ہے۔
انسان کے پاس سب سے قیمتی متاع اس کی جان ہے، اور پاک افواج کے جوان اسی جان کو وطن پر قربان کرنے کا عزم رکھتے ہیں تاکہ پاکستان کی آزادی، خودمختاری، عزت اور عوام کی جان و مال محفوظ رہ سکے۔
قانون کی نظر میں سب برابر ہیں
ہم مطالبہ کرتے ہیں کہ اگر کوئی شخص یا جماعت پاک افواج، شہداء یا غازیوں کی قربانیوں کے بارے میں توہین آمیز یا غیر ذمہ دارانہ گفتگو کرے تو اس کے خلاف آئین و قانون کے مطابق بلاامتیاز کارروائی کی جائے۔
یہ امر بھی قابلِ ذکر ہے کہ پاک افواج کے افسران اور جوان بھی دیگر شہریوں کی طرح قانون کے مطابق اپنی آمدنی پر ٹیکس ادا کرتے ہیں۔ لہٰذا ہر فرد اور ادارے کو بھی اپنے مالی معاملات، اثاثوں اور ٹیکس ادائیگی میں مکمل شفافیت اختیار کرنی چاہیے۔
نوجوانوں میں حب الوطنی کا فروغ
پاکستان ایکس سروس مین سوسائٹی حکومتِ پاکستان سے اپیل کرتی ہے کہ نوجوان نسل میں حب الوطنی، نظم و ضبط، قومی خدمت اور ذمہ داری کے جذبے کو فروغ دینے کے لیے مؤثر قومی پالیسی مرتب کی جائے تاکہ نئی نسل ملک و قوم کی خدمت کے لیے ہر وقت تیار رہے۔
شفافیت اور احتساب
ہم اس بات پر یقین رکھتے ہیں کہ ملک کے تمام رجسٹرڈ اداروں، سیاسی و مذہبی جماعتوں، مدارس اور دیگر تنظیموں کے مالی معاملات اور اثاثوں کی جانچ پڑتال قانون کے مطابق، شفاف اور بلاامتیاز انداز میں ہونی چاہیے تاکہ عوام کا اعتماد مزید مضبوط ہو۔
اختلافِ رائے ضرور، مگر توہین ہرگز نہیں
اختلافِ رائے ہر شہری کا آئینی اور جمہوری حق ہے، لیکن شہدائے پاکستان، غازیوں اور پاک افواج کی قربانیوں کی توہین کسی بھی صورت قابلِ قبول نہیں۔
ہم ایسے تمام بیانات کی شدید مذمت کرتے ہیں جو شہداء اور غازیوں کی عظمت کو مجروح کریں، اور متعلقہ شخصیات سے توقع رکھتے ہیں کہ وہ قومی یکجہتی، باہمی احترام اور ذمہ دارانہ طرزِ گفتگو کو فروغ دیں۔
قوم کے نام ہمارا عہد
ہم، پاکستان ایکس سروس مین سوسائٹی کے لاکھوں سابق فوجی، کل بھی اپنی مسلح افواج کے شانہ بشانہ تھے، آج بھی ان کے ساتھ کھڑے ہیں اور ان شاء اللہ ہمیشہ پاکستان کے دفاع، سلامتی اور استحکام کے لیے ان کے شانہ بشانہ رہیں گے۔
About The Author
