عمان میں حوثی ترجمان اور سعودی وفد کے درمیان اہم ملاقات، اقوامِ متحدہ نے مذاکرات پر زور دے دیا -

یمن کی حوثی اکثریتی تنظیم انصار اللہ کے ذرائع کے مطابق علاقائی کشیدگی اور یمن کی صورتحال پر عمان میں حوثی قیادت اور سعودی وفد کے درمیان اہم ملاقات ہوئی، جس میں امن مذاکرات کی بحالی اور خطے میں استحکام سے متعلق امور پر تبادلہ خیال کیا گیا۔

حوثی ذرائع کے مطابق انصار اللہ کے سیاسی بیورو کے ترجمان محمد عبدالسلام نے عمان کے دارالحکومت مسقط میں سعودی وفد سے ملاقات کی۔ ملاقات کے دوران علاقائی سلامتی، یمن کی موجودہ صورتحال اور کشیدگی کم کرنے کے لیے ممکنہ اقدامات پر گفتگو ہوئی۔

قطری ٹی وی کی رپورٹ کے مطابق یمن کے لیے اقوامِ متحدہ کے خصوصی ایلچی اور عمانی حکام نے دونوں فریقوں پر زور دیا ہے کہ وہ تعطل کا شکار امن مذاکرات کو دوبارہ شروع کریں تاکہ سیاسی حل کی راہ ہموار ہو سکے۔