چین نے غیر ملکی مسافروں کے لیے سفر کو مزید آسان بنانے کے مقصد سے اپنی ویزا فری انٹری پالیسی میں توسیع اور بارڈر کنٹرول کے نظام کو جدید ڈیجیٹل سہولتوں سے آراستہ کرنے کا اعلان کر دیا ہے۔ حکام کے مطابق یہ اقدامات چین کو دنیا کے لیے مزید کھولنے اور بین الاقوامی سیاحت، کاروباری سرگرمیوں اور عوامی روابط کو فروغ دینے کی حکومتی حکمت عملی کا حصہ ہیں۔
چین کی وزارتِ عوامی تحفظ کے مطابق نئے منصوبے کے تحت غیر ملکی سیاحوں، سرمایہ کاروں، کاروباری افراد اور دیگر مسافروں کے لیے امیگریشن کا عمل زیادہ تیز، آسان اور مؤثر بنایا جائے گا۔ سرکاری خبر رساں ادارے ژنہوا کے مطابق حکومت ویزا فری ٹرانزٹ اور داخلے سے متعلق قواعد کو مزید بہتر بنانے پر بھی کام کر رہی ہے۔
منصوبے کے تحت ڈیجیٹل سفری دستاویزات، بشمول ای پاسپورٹ اور دیگر الیکٹرانک سفری اجازت ناموں کے استعمال کو فروغ دیا جائے گا تاکہ کاغذی کارروائی میں کمی آئے اور مسافروں کو امیگریشن کے دوران کم سے کم وقت صرف کرنا پڑے۔
اس کے علاوہ ملک بھر میں مزید اسمارٹ بارڈر چینلز قائم کیے جائیں گے، جہاں اہل مسافر خودکار نظام کے ذریعے امیگریشن کی کارروائی تیزی سے مکمل کر سکیں گے۔ چینی حکومت ویزا، رہائشی اجازت ناموں اور دیگر امیگریشن خدمات کو بھی مرحلہ وار مکمل طور پر آن لائن منتقل کرنے کا ارادہ رکھتی ہے، جس سے درخواستوں کی پراسیسنگ مزید آسان اور شفاف ہو جائے گی۔
حکام کے مطابق یہ اقدامات چین کی اس وسیع پالیسی کا حصہ ہیں جس کے تحت بیرون ملک سے آنے والے افراد کے لیے داخلے اور قیام سے متعلق قوانین کو جدید تقاضوں سے ہم آہنگ کیا جا رہا ہے۔
سرکاری اعداد و شمار کے مطابق اس وقت 50 ممالک کے شہری چین میں یکطرفہ ویزا فری داخلے کی سہولت سے فائدہ اٹھا رہے ہیں، جبکہ 55 ممالک کے مسافر 65 داخلی مقامات کے ذریعے 240 گھنٹے تک بغیر ویزا ٹرانزٹ کی سہولت استعمال کر سکتے ہیں۔
چین میں غیر ملکی مسافروں کی آمد میں بھی نمایاں اضافہ ریکارڈ کیا گیا ہے۔ سرکاری اعداد و شمار کے مطابق 2026 کے پہلے چھ ماہ کے دوران تقریباً 2 کروڑ 30 لاکھ غیر ملکی شہری چین آئے، جو گزشتہ سال کی اسی مدت کے مقابلے میں 20.4 فیصد زیادہ ہے۔ حکام کا کہنا ہے کہ اس اضافے کی بڑی وجہ ویزا اور امیگریشن پالیسیوں میں نرمی اور جدید سہولتوں کی فراہمی ہے۔
اعداد و شمار کے مطابق چین آنے والے غیر ملکی مسافروں میں سب سے زیادہ تعداد جنوبی کوریا، روس، ملائیشیا، ویتنام، تھائی لینڈ، سنگاپور، امریکا، جاپان، منگولیا اور آسٹریلیا کے شہریوں کی رہی۔
About The Author
