اسلام آباد: قومی ایئر لائن پی آئی اے نے 8 اگست سے اربعین کیلئے خصوصی فلائٹ آپریشن چلانے کا اعلان کردیا۔ ذرائع کے مطابق پی آئی اے نے اربعین کے خصوصی فلائٹ آپریشن کیلئے فی مسافر دو طرفہ کرایہ 675 ڈالر (تقریباً ایک لاکھ 94 ہزار روپے) مقرر کیا ہے۔
وفاقی وزیر داخلہ محسن نقوی نے اربعین کیلئے زائرین کے بذریعہ سڑک ایران اور عراق جانے پر پابندی عائد کردی ہے، یہ پابندی سیکیورٹی خدشات کے باعث لگائی ہے۔
پاکستان انٹرنیشنل ایئر لائنز نے اربعین کیلئے خصوصی فلائٹ آپریشن چلانے کا اعلان کردیا، پاکستان سے نجف روانگی کی خصوصی پروازیں 8 اگست سے 11 اگست تک چلائی جائیں گی، نجف سے پاکستان واپسی کی پروازیں 18 اگست تا 23 اگست تک چلیں گی۔
ذرائع کے مطابق عراق جانیوالے زائرین نے پی آئی اے سے کرایہ کم کرنے اور مزید اضافی پروازیں چلانے کی درخواست کی ہے۔
پاکستان سے بذریعہ سڑک ہر سال لاکھوں لوگ ایران کے راستے عراقی شہر نجف جاتے ہیں۔ زائرین کا کہنا ہے کہ سڑک کے ذریعے نجف جانے پر پابندی کے باعث حکومت نے پی آئی اے کو اربعین کیلئے مزید اضافی پروازیں چلانے کی ہدایت کی ہے۔
