نئی دہلی – بھارتی میڈیا کی جانب سے ایک بار پھر پاکستان مخالف پروپیگنڈے کا سلسلہ شروع کر دیا گیا ہے۔ فالس فلیگ آپریشن کے تحت جھوٹ اور من گھڑت خبریں پھیلا کر عوام کو گمراہ کرنے کی ناکام کوشش کی جا رہی ہے۔
رپورٹس کے مطابق بھارتی میڈیا نے اتر پردیش اور حیدرآباد میں مقامی دہشت گردوں کو پاکستان سے جوڑنے کی ناکام کوشش کی، صبح سے ہی بھارتی چینلز نے پاکستان مخالف جھوٹ اور پروپیگنڈے کی نئی لہر چلا دی۔
ابتدائی تحقیقات میں یہ بات سامنے آئی ہے کہ گرفتار دہشت گرد بھارت کے اپنے شہری ہیں، تاہم بھارتی میڈیا نے اس کے برعکس خبریں چلا کر جھوٹ گھڑنے کے نئے ریکارڈ قائم کر دیے۔
ذرائع کے مطابق بھارتی میڈیا کبھی کیمیکل اٹیک کی کہانی سناتا ہے، کبھی پاکستانی اسلحے کا ڈھونگ رچاتا ہے۔ لال قلعہ دھماکے کے بعد بھارتی پولیس کا ابتدائی مؤقف سلنڈر دھماکے کا تھا، مگر چند ہی گھنٹوں میں بیانیہ بدل کر پاکستان پر الزامات کی بوچھاڑ شروع کر دی گئی۔
تجزیہ کاروں کے مطابق بھارتی میڈیا کا کردار ہمیشہ کی طرح مشکوک اور غیر ذمہ دارانہ رہا ہے۔ بھارتی چینلز نے ناظرین کو گمراہ کرنے کے لیے درجنوں جعلی کہانیاں نشر کیں تاکہ بھارت کی داخلی ناکامیوں اور عوامی غصے سے توجہ ہٹائی جا سکے۔
پاکستان نے بارہا واضح کیا ہے کہ وہ دہشت گردی کی ہر صورت میں مذمت کرتا ہے اور امن کا خواہاں ہے۔
ماہرین کے مطابق بھارت کے ان فالس فلیگ آپریشنز کا مقصد عالمی برادری کو گمراہ کرنا اور اپنے اندرونی بحران سے دنیا کی توجہ ہٹانا ہے۔
