سڈنی: آسٹریلیا کی بگ بیش لیگ (BBL) نے ٹی ٹوئنٹی کرکٹ میں ایک نمایاں اور غیر معمولی تجربہ کرنے کا فیصلہ کرتے ہوئے اگلے سیزن سے ’سپر سب‘ طرز کے نئے قانون کے نفاذ کا اعلان کر دیا ہے، جسے ’ڈیزگنیٹڈ بیٹر رول‘ کا نام دیا گیا ہے۔
لیگ انتظامیہ کے مطابق اس نئے قانون کے تحت ٹاس سے قبل دونوں ٹیموں کو اختیار حاصل ہوگا کہ وہ اپنی پلیئنگ الیون میں سے کسی ایک کھلاڑی کو ڈیزگنیٹڈ بیٹر نامزد کریں۔ اس کے ساتھ ہی ٹیم کو لازمی طور پر ایک ڈیزگنیٹڈ فیلڈر بھی مقرر کرنا ہوگا۔
قانون کے مطابق میچ کے دوران ڈیزگنیٹڈ فیلڈر، ڈیزگنیٹڈ بیٹر کی جگہ فیلڈنگ انجام دے گا، جبکہ ڈیزگنیٹڈ بیٹر صرف بیٹنگ کے لیے استعمال کیا جا سکے گا۔ اس طریقۂ کار کے ذریعے ٹیمیں اپنی بیٹنگ اور فیلڈنگ صلاحیتوں کو علیحدہ علیحدہ اور زیادہ مؤثر انداز میں بروئے کار لا سکیں گی۔
بگ بیش لیگ حکام کا کہنا ہے کہ اس نئے قانون کا مقصد لیگ کو مزید دلچسپ بنانا، حکمتِ عملی میں تنوع پیدا کرنا اور ٹیم مینجمنٹ کو نئے اسٹریٹجک مواقع فراہم کرنا ہے۔ اس تبدیلی سے خاص طور پر ماہر بیٹرز اور فیلڈنگ اسپیشلسٹس کے کردار میں نمایاں فرق دیکھنے کو مل سکتا ہے۔
کرکٹ تجزیہ کاروں کے مطابق اگر یہ تجربہ کامیاب رہا تو مستقبل میں دیگر ٹی ٹوئنٹی لیگز اور حتیٰ کہ بین الاقوامی کرکٹ میں بھی اس طرز کے قوانین پر غور کیا جا سکتا ہے، تاہم اس پر بحث پہلے ہی شروع ہو چکی ہے کہ آیا یہ تبدیلی کھیل کی روایتی ساخت کو متاثر کرے گی یا نہیں۔
About The Author
