پاکستان کرکٹ کے سب سے بڑے ایونٹ پاکستان سپر لیگ (پی ایس ایل) کے گیارہویں ایڈیشن کے فائنل میچ کے حوالے سے اہم فیصلہ سامنے آیا ہے، جس کے تحت وزیرِ اعظم شہباز شریف نے شائقینِ کرکٹ کو اسٹیڈیم میں آ کر میچ دیکھنے کی اجازت دے دی ہے۔
پاکستان کرکٹ بورڈ (پی سی بی) کے چیئرمین محسن نقوی کے مطابق انہوں نے وزیراعظم سے باقاعدہ درخواست کی تھی کہ فائنل میچ کے لیے تماشائیوں کو گراؤنڈ میں آنے کی اجازت دی جائے۔ ان کے مطابق وزیراعظم شہباز شریف بھی اس بات کے خواہشمند تھے کہ کرکٹ فینز کو یہ موقع فراہم کیا جائے، جس کے بعد حتمی منظوری دے دی گئی۔
محسن نقوی نے بتایا کہ یہ فیصلہ فرنچائز مالکان کی درخواست پر بھی کیا گیا، جنہوں نے پی ایس ایل کے فائنل کو ایک بھرپور اور شائقین سے بھرے ماحول میں کرانے کی خواہش ظاہر کی تھی۔ انہوں نے وزیراعظم کے فیصلے کو سراہتے ہوئے شکریہ بھی ادا کیا۔
چیئرمین پی سی بی کے مطابق وزیراعظم نے اس موقع پر کفایت شعاری مہم کو بھی مدنظر رکھنے کی ہدایت کی ہے، تاہم کرکٹ کی مقبولیت اور عوامی دلچسپی کے باعث فائنل میچ کے لیے نرمی برتی گئی ہے۔
یاد رہے کہ اس سال پی ایس ایل کے بیشتر میچز میں کفایت شعاری مہم کے تحت شائقین کو اسٹیڈیم میں داخلے کی اجازت نہیں دی گئی تھی، جس کے باعث میچز نسبتاً خالی اسٹینڈز میں کھیلے جا رہے تھے۔
دوسری جانب اسلام آباد یونائیٹڈ پہلے ہی پلے آف مرحلے میں جگہ بنانے والی تیسری ٹیم بن چکی ہے، جبکہ پی ایس ایل 11 کا فائنل 3 مئی کو لاہور میں شیڈول ہے۔ شائقین کی واپسی سے توقع کی جا رہی ہے کہ فائنل میچ ایک بھرپور اور پرجوش ماحول میں کھیلا جائے گا۔
About The Author
