امریکا میں سیاسی ہلچل اس وقت شدت اختیار کر گئی جب جنسی زیادتی کے الزامات کا سامنا کرنے والے دو اراکین کانگریس Eric Swalwell اور Tony Gonzales کو اپنے عہدوں سے استعفیٰ دینا پڑ گیا۔ دونوں کے خلاف باضابطہ تحقیقات کا آغاز بھی کر دیا گیا ہے۔
ڈیموکریٹک رکن ایریک سوالویل پر اپنی سابقہ اسٹاف رکن کے ساتھ جنسی حملے کے الزامات عائد کیے گئے تھے، جبکہ مزید رپورٹس میں یہ بھی دعویٰ سامنے آیا کہ انہوں نے چار دیگر خواتین کو نامناسب نوعیت کے پیغامات بھیجے۔ ان الزامات کے بعد ان پر اپنی جماعت کی جانب سے شدید دباؤ تھا کہ وہ مستعفی ہو جائیں، بصورت دیگر کانگریس میں ان کی رکنیت ختم کرنے کے لیے قرارداد پیش کی جا سکتی تھی۔
ایریک سوالویل، جو سات بار رکن کانگریس منتخب ہو چکے تھے، ریاست California کے گورنر کے انتخاب میں حصہ لینے کے خواہشمند تھے اور موجودہ گورنر Gavin Newsom کی جگہ لینے کی مہم بھی چلا رہے تھے، تاہم انہوں نے الزامات سامنے آنے کے بعد اپنی انتخابی مہم ختم کر دی۔
بیورلی ہلز میں ایک پریس کانفرنس کے دوران متاثرہ خاتون کی وکیل نے مؤقف اختیار کیا کہ سوالویل نے کانگریس کی ممکنہ سماعت سے بچنے کے لیے استعفیٰ دیا، جبکہ شکایت کنندہ Lonna Drewes نے اعلان کیا ہے کہ وہ اس معاملے میں پولیس رپورٹ درج کرا رہی ہیں۔ دوسری جانب سوالویل نے الزامات کا دفاع کرنے کا عندیہ دیا ہے۔
ادھر ٹیکساس سے تعلق رکھنے والے ریپبلکن رکن کانگریس ٹونی گونزالز، جو 2020 میں پہلی بار منتخب ہوئے تھے، پر بھی اپنی اسٹاف رکن کے ساتھ نامناسب تعلقات کا الزام عائد کیا گیا۔ رپورٹس کے مطابق متعلقہ خاتون بعد ازاں خودکشی کر چکی ہے، جس کے باعث کیس کی نوعیت مزید حساس ہو گئی ہے۔
سیاسی مبصرین کے مطابق دونوں اراکین کے استعفے امریکی سیاست میں احتساب کے بڑھتے ہوئے دباؤ اور جنسی ہراسانی کے معاملات پر سخت رویے کی عکاسی کرتے ہیں، جبکہ خالی ہونے والی نشستوں پر جلد ضمنی انتخابات متوقع ہیں۔
About The Author
