بھارتی وزیر اعلیٰ کا متنازعہ بیان: بنگلہ دیش کا احتجاج، سفارتکار طلب -

بنگلہ دیش نے بھارت کے قائم مقام ہائی کمشنر پون بدھے کو طلب کر کے آسام کے وزیراعلیٰ ہمانتا بسوا سرما کے متنازع بیانات پر شدید احتجاج ریکارڈ کرایا ہے، جس سے دونوں ممالک کے درمیان سفارتی کشیدگی میں اضافہ دیکھنے میں آ رہا ہے۔

بنگلہ دیشی وزارتِ خارجہ کے مطابق بھارتی سفارتکار کو طلب کر کے حکومت کی جانب سے سخت ناراضی کا اظہار کیا گیا اور ان بیانات کو توہین آمیز اور دوطرفہ تعلقات کے منافی قرار دیا گیا۔ اس موقع پر جنوبی ایشیا کے ڈائریکٹر جنرل عشرت جہاں نے باضابطہ طور پر بنگلہ دیش کا مؤقف پیش کیا۔

یہ تنازع اس وقت سامنے آیا جب ہمانتا بسوا سرما نے ایک بھارتی میڈیا انٹرویو اور سوشل میڈیا پوسٹ میں مبینہ طور پر غیر قانونی بنگلہ دیشی شہریوں کی آسام سے بے دخلی کے حوالے سے سخت اور اشتعال انگیز الفاظ استعمال کیے۔

بنگلہ دیشی حکام نے خبردار کیا کہ اس نوعیت کے بیانات دونوں ممالک کے درمیان باہمی اعتماد کو نقصان پہنچا سکتے ہیں۔ حکومت نے نئی دہلی سے مطالبہ کیا ہے کہ وہ اس معاملے کا نوٹس لے اور اس بات کو یقینی بنائے کہ سرکاری شخصیات کے بیانات دوطرفہ تعلقات پر منفی اثر نہ ڈالیں۔

یہ پیش رفت ایک ایسے وقت میں سامنے آئی ہے جب بنگلہ دیش اور بھارت سرحدی انتظام، ہجرت اور اقتصادی تعاون سمیت مختلف امور پر رابطے میں ہیں، تاہم حالیہ صورتحال نے علاقائی سفارت کاری میں نئی پیچیدگیاں پیدا کر دی ہیں۔