میئر کراچی مرتضیٰ وہاب کا کہنا ہے کہ اربن فارسٹ منصوبہ شہر قائد کی آلودگی کم کرنے کیلئے اہم سنگِ میل ثابت ہوگا۔
کراچی میں میڈیا سے گفتگو کرتے ہوئے مرتضیٰ وہاب نے کہا کہ شاہراہ بھٹو پر 10 ہزار درخت لگادیے گئے ہیں اور ایک لاکھ پودے لگانے کا ہدف ہے، اربن فاریسٹ کا یہ منصوبہ کراچی کو سرسبز اور ماحول دوست شہر بنانے کا بڑا اقدام ہے۔
میئرکراچی نے یہ بھی کہا کہ کراچی میں فضائی آلودگی کم کرنے کیلئے اربن فاریسٹ منصوبہ اہم سنگِ میل ثابت ہوگا، ماحولیاتی بہتری کیلئے شجرکاری مہم تیز کر دی ہے، شاہراہ بھٹو پرنیم، گل مہر اور دیگر درخت لگائے جائیں گے جبکہ شاہراہِ بھٹو پر شجرکاری منصوبہ مرحلہ وار مکمل کیا جائے گا۔
انہوں نے مزید کہا کہ کراچی میں آکسیجن لیول بہتر بنانے کیلئے بڑے پیمانے پر درخت لگانے کا آغازکیا گیا ہے، شہر کو گرین سٹی بنانے کیلئے عملی اقدامات جاری ہیں، کراچی کی خوبصورتی اور ماحولیات ہماری ترجیح ہے۔
مرتضیٰ وہاب کا کہنا تھا کہ شاہراہ بھٹو کے اطراف ہم نے گرین زون بنانے کا فیصلہ کیا تھا، 2 ماہ قبل یہاں بلدیہ عظمیٰ کراچی کے محکمہ پارکس نے کام کا آغاز کیا، یہاں ایک لاکھ مقامی پودے لگائیں جائیں گے، کورنگی میں ہم نے نیم کے درخت لگائے، شہر کے ساتوں اضلاع میں گرین زونز بنائیں گے، شہری گرین زونز بنانے میں ہمارا ساتھ دیں اور صدقہ جاریہ کے طور پر پودا لگائیں۔
ترقیاتی کاموں کے حوالے سے بات کرتے ہوئے انہوں نے کہا کہ شاہراہ بھٹو ، بلوچ کالونی ایکسپریس وے، کورنگی کازوے اور تاج حیدربرج بنا رہےہیں، شہر کے مختلف علاقوں میں ترقیاتی کام جاری ہے۔
About The Author
